Мииринэйгэ «Кыайыы туһугар!» аһымал кэнсиэр буолла

Мииринэй куоракка Ийэ дойду көмүскээччилэрин өйөөн аһымал кэнсиэр тэрилиннэ. Хомуллубут үп-харчы бүтүннүүтэ  байыаннай дьайыы кыттыылаахтарыгар көмөҕө туһуланыаҕа, диэн «Аҕа дойдуну көмүскээччилэр» пуонда Саха сиринээҕи филиалыттан иһитиннэрдилэр.

Пуонда социальнай координатордара Анна Гайворонская уонна Жанна Агафонова тэрээһиҥҥэ бэтэрээннэри уонна байыаннай дьайыы байыастарын дьиэ кэргэттэрин ыҥырарга көмөлөстүлэр. Ыалдьыттар кэнсиэри тэрийээччилэргэ махталларын биллэрдилэр. Кинилэр этэллэринэн, тэрээһин олус истиҥник уонна дууһаны таарыйардык ааста.

«Ыытааччылар бырагырааманы олус чэпчэкитик тэрийдилэр. Ордук гитара доҕуһуоллаах ырыа сүрэҕи-быары хамсатта — маннык түгэннэр үйэ-саас тухары өйгө хаалаллар. Дьон бииргэ түмсүүтэ, өйөбүлэ күүскэ билиннэ», — диэн анал байыаннай дьайыы бэтэрээнэ Сергей Егоров кэпсээтэ.

«Кыттыбыт дьоҥҥо барыларыгар махтал. Миэхэ, байыаннай дьайыы кыттыылааҕар,  артыыстарбытын көрөр-истэр олус күндү. Ону таһынан «Биһиги бииргэбит!», «Көмүс илиилэр», «Аанньал», «Норуот актива» волонтерскай ыстааптарга, «Аҕа дойдуну көмүскээччилэр» пуонда филиалыгар уонна Мииринэй куорат дьаһалтатыгар махтаныахпын баҕарабын», — диэн байыаннай дьайыы өссө биир бэтэрээнэ Сергей Сорокин эбэн эттэ.

«Аҕа дойдуну көмүскээччилэр» пуонда Саха сиринээҕи филиалыгар бэлиэтээбиттэринэн, маннык тэрээһиннэр олохтоохтору сомоҕолууллар. «Кэнсиэр үрдүк сыалын-соругун бары өйдүүллэр. Биһиги байыастарбытыгар болҕомто уонна өйөбүл уурар олус суолталаах. «Кыайыы туһугар!» кэнсиэр биһиги күүспүтүн сомоҕолоһууга, бэйэ-бэйэни өйөһүүгэ уонна уопсай кыайыыга эрэлгэ сытарын өссө төгүл көрдөрдө», – диэн тэрийээччилэр  бэлиэтээтилэр.