Мииринэйгэ массыынаны күрэппит 41 саастаах эр киһи тутулунна

ИДьМ сулууспатын Мииринэй улууһугар отделын дьуһуурунай чааһыгар Мииринэй олохтооҕо тимир көлөтүн күрэппиттэрин туһунан тыллаабыт. Эмсэҕэлээччи иһитиннэрбитинэн, кини «Toyota Allion» массыынатын үлэтин аттыгар хаалларбыт, оттон сарсыарда тиийэн миэстэтигэр тимир көлөтүн булбатах.

Холуобунай ирдэбил үлэһиттэрэ буруйу оҥорууга уорбаланар 41 саастаах эр киһи буоларын быһаардылар, диэн ИДьМ сулууспатын Мииринэй улууһугар отделын пресс-сулууспата иһитиннэрэр.

Силиэстийэ чахчыларынан, быһылаан буолбут күнүгэр уорбаланааччы итирик туруктаах сылдьан, массыынаны стоянкаҕа турарын бэлиэтии көрөн, хатааһылыырга быһаарыммыт.

Тимир көлө аана хатаммакка турар, оттон күлүүһэ зажигание замуогар баар эбит. Ону туһанан, эр киһи солуон иһигэр киирбит, собуоттаабыт уонна куорат устун хатааһылыы барбыт. Сарсыарданан кини тимир көлөнү Советскай уулуссаҕа баар биир элбэх кыбартыыралаах дьиэ тиэргэнигэр хаалларбыт.
Российскай Федерация Холуобунай Кодексатын 166-с ыстатыйатынан холуобунай дьыала тэрилиннэ.