Мииринэйгэ сир аннынааҕы руднигы тутуу былаанын Арассыыйа бэрэсидьиэнэ өйөөтө

“Мир” алмаастаах сиргэ сир аннынааҕы саҥа руднигы тутуу былаанын Арассыыйа бэрэсиэдьиэнэ Владимир Путин өйөөтө. АЛРОСА “Мир-глубокий» киэҥ хабааннаах инвест-бырайыагы олоххо  киллэриини быйылгыттан саҕалыаҕа.

Ол туһунан Ил Дархан Айсен Николаев АЛРОСА кэлэктиибин уонна Мииринэй улууһун олохтоохторун кытары видео-сибээһинэн көрсүһүүгэ иһитиннэрдэ.

Эрэгийиэн баһылыга эппитинэн, “”Мир” рудник бырайыагын олоххо киллэрии Мииринэй куорат сайдыытын боппуруостарын хас эмэ көлүөнэҕэ быһаарыаҕа.

«Бу биһиги уопсай ситиһиибит, бу бырайыак толору толорулларын уонна кылгас кэм иһигэр олоххо киллэриллэрин курдук барытын оҥоруохтаахпыт”, — диэн Айсен Николаев бэлиэтээн эттэ.

Рудникка алмааһы хостооһун 2032 сылтан саҕаланара сабаҕаланар. Руднигы тутуу кэмигэр үлэһиттэр ахсааннара 450-ча киһиэхэ тиийиэҕэ, ону таһынан 3 №-дээх байытар фабрика сылы быһа үлэлиир эрэһиимҥэ киириэн сөп, оччотугар дражнай комплекска 250-тан тахса сезонунан үлэлиир оробуочай миэстэ таһаарыллыаҕа.

Рудник сылга 2 мөлүйүөн туонна руданы уонна 3 мөлүйүөн курдук алмаас каратын оҥоруоҕа.

Ил Дархан: “Мииринэй улууһугар олох төһө тупсаҕайыттан инникитин алмаастаах салаа кыаҕа тутулуктаах”, — диэтэ.

Иккис улахан хайысха – улуус социальнай сайдыыта.

Киэҥ ыҥырыылаах мунньахха АЛРОСА генеральнай дириэктэрэ Павел Маринычев,  Мииринэй улууһун баһылыга Александр Басыров уонна АЛРОСА, муниципалитеттар, бүддьүөт тэрилтэлэрин 650 салайааччыта уонна Мииринэй улууһун олохтоохторо кытыннылар.

Павел Маринычев уонна улуус баһылыга Александр Басыров Ил Дархан АЛРОСА олоҕор көхтөөхтүк кыттарын уонна өйүүрүн туһунан эттилэр.

Айсен Николаев ыйытыыларга хоруйдууругар улуус экэниэмикэ уонна социальнай эйгэ кэккэ хайысхаларыгар биир кэлим сайдыаҕын туһунан: “Сүрүн сорук – дьон олоҕун үрдүк хаачыстыбатын хааччыйыы, — диэтэ Айсен Николаев.