Мииринэйгэ водолазтар ууттан эр киһи өлүгүн буллулар

СӨ быыһыыр сулууспатын водолазтара бүгүн, балаҕан ыйын 25 күнүгэр, 09:27 чааска Мииринэй оройуонун Чернышевскай бөһүөлэгэр эр киһи өлүгүн буллулар. Бу туһунан биэдэмистибэ пресс-сулууспата иһитиннэрэр.

Мииринэйдээҕи ЕДДС информациятынан, Чернышевскай бөһүөлэгэр балаҕан ыйын 9 күнүгэр эр киһи сүппүт. Бу туһунан ол күн 07:32 чааска баһылык иһитиннэрбит. Водохранлище кытылыттан бу киһи быыһыыр сэлиэччигин уонна оҥочотун булбуттар.  Полиция уонна Росгвардия үлэһиттэрэ суһаллык көрдүүр үлэни ыыппыттара даҕаны, булбатахтара.

Балаҕан ыйын 9 күнүгэр Ньурбатааҕы көрдүүр-быыһыыр этэрээт икки быыһааччыта көрдүү тиийбиттэрэ. Балаҕан ыйын 22 күнүгэр Дьокуускайтан үс киһилээх водолазтар бөлөхтөрө туруммута. Балаҕан ыйын 25 күнүгэр көрдөөн саҕалаан, 09:27 чааска өлүгү ууттан булан, аймахарыгар тиэрдибиттэр.