Мииринэйгэ Оҕо дыбарыаһын тутуу этэҥҥэ баран иһэр

Бүгүн, олунньу 17 күнүгэр, Мииринэй куоракка «Алмаастаах кыраай» медиахампаанньа быһа эпииригэр Ил Дархан Айсен Николаев Мииринэй уонна Ленскэй олохтоохторун ыйытыыларыгар хоруйдаата.

Ол курдук, Мииринэй олохтооҕо быһа эпииргэ сибээскэ тахсан, Мииринэйгэ тутулла турар Оҕо дыбарыаһын тутуута туохтан бытаарбытын ыйытта.

— Мииринэйгэ  Оҕо дыбарыаһын тутулла туруоҕуттан хаста даҕаны көрдүм. Кыраапыктан улахан хаалыы суох. Арай биир-икки нэдиэлэ хойутааһын баар буолуон сөп. Ититиитин номнуо биэрэн эрэллэр. Кэлэр нэдиэлэттэн дыбарыас ис бараанын оҥоруу үлэтэ саҕаланыаҕа. Тустаах тэриллэр, миэбэллэр барыта атыылаһыллан бэлэмнэр.