Милиция легендата Ариан Игнатьев хорсун быһыытын ахтан-санаан аастылар

Бүгүн Сунтаардааҕы Ис дьыала отделын актовай саалатыгар биир дойдулаахпыт, милиция легендата Ариан Иванович Игнатьев хорсун быһыытын 50 сылынан полиция үлэһиттэригэр, колледж устудьуоннарыгар ахтылҕан, үйэтитии көрсүһүү тэрилиннэ.

Манна милиция бэтэрээннэрэ Анатолий Семенов, Егор Свинобоев, Тойбохой түмэлиттэн Александр Евсеев кэлэн кини туһунан олус истиҥ ахтыы оҥордулар. Көрсүһүүгэ саҥа анаммыт улуус баһылыгын социальнай уонна имиджевэй бэлиитикэҕэ солбуйааччы Мирослав Иванов кытынна.

Бу тэрээһин түмүгүнэн аны полиция үлэһиттэрэ кини туһунан профилактическай үлэҕэ кэпсиэхтэрэ, кини хорсун быһыытын сырдатыахтара. Мантан саҕыллан актовай саалаҕа уруһуйдаммыт милициялар кимнээх буолалларын туһунан бэтэрээннэр кэпсээннэрэ диэни тэрийиэххэ диэн буолла уонна «Албан аат» болуоссатыгар герой милициялар мэтириэтин сөргүтүү үлэтэ барарын туһунан туруорустубут.

Тускулаана Горохова-Кобельянова