Күндү бэтэрээннэр!
Убаастабыллаах Саха сирин олохтоохторо!
Арассыыйа Сэбилэниилээх күүстэрин хорсун-хоодуот буойуттара!
Милитаристскай Японияны Кыайыы күнүнэн уонна Иккис аан дойду сэриитэ түмүктэммит күнүнэн эҕэрдэлиибин!
Уһук Илиҥҥэ байыаннай дьайыыларга биһиги норуоппут кыайбыта 79-с сылыгар, биһиги бүгүн Ийэ дойдубутун көмүскээччилэр хорсун быһыыларын кэриэстиирбитин уонна ытыктыырбытын биллэрэбит.
Саха сириттэн 3,5 тыһыынчаттан тахса саллааттар уонна офицердар дьоруойдуу быһыыны көрдөрөн, оччотооҕу аан дойду биир саамай күүстээх аармыйатын — дьоппуоннар Императорскай аармыйаларын кылгас кэмҥэ үлтүрүппүттэрэ.
Саха сирин байыастара Забайкальскай фронт 17-с аармыйатын 278 стрелковай дивизиятын уонна 39-с аармыйатын 210-с, 94-с стрелковай дивизияларын састаабыгар бэйэлэрин чулуу пехотинец уонна бэргэн снайпер быһыытынан көрдөрбүттэрэ.
Саха сирин буойуннара сэриилэһэргэ анал үөрэхтээх, толору сэбилэниилээх, мөлүйүөн ахсааннаах Квантунскай аармыйаны кытта кырыктаах кыргыһыыга кыайыылаах тахсыбыттара.
Биһиги аҕаларбыт, эһэлэрбит Маньчжурия, Сахалин, Курильскай арыылар, Хотугу Корея иһин уонна Кытайга Хайларскай кириэппэһи ыларга хааннаах кыргыһыыларга кыайан, тулхадыйбат албан ааттаммыттара.
Японияны кыайыыбыт уонна Иккис аан дойду сэриитэ түмүктэниитэ билиҥҥи Япония уонна арҕааҥҥы бэлиитиктэргэ үчүгэй уруок буолар. Биһиги норуоппутун утары барыы, сэрии сэбинэн суоһурҕаныы милитаристар, агрессордар эстиилэригэр син биир тиэрдэр.
Бүгүн мин бойобуой балаһыанньаҕа Арассыыйаҕа буойун албан аатын көрсөөччүлэри эҕэрдэлиибин. Анал байыаннай дьайыы байыастарыгар тулуурдарын, хорсун быһыыларын иһин махтанабын. 1941-1945 сылларга аҕаларгыт, эһэлэргит курдук дойдубут эйэлээх олоҕун көмүскүүгүт, нацизм сайдарын урусхаллыыгыт.
Биһиги сэбиэскэй норуот милитаристскай Японияны уонна иккис аан дойду сэриитин кыайбытын хаһан да умнуохпут суоҕа!
Кыайыылаах норуокка уруй! Кыайыы куруук биһигини кытта!
Саха сирин Ил Дархана А.С. Николаев.
Сообщить об опечатке
Текст, который будет отправлен нашим редакторам: