“Мин идэм — ИТ” Бүтүн Арассыыйатааҕы күрэс өрөспүүбүлүкэтээҕи түһүмэҕин үөрүүлээх аһыллыыта буолла

Саха сиригэр 2016 сылтан ыытыллар Бүтүн Арассыыйатааҕы “Мин идэм — ИТ” күрэс өрөспүүбүлүкэтээҕи түһүмэҕин үөрүүлээх аһыллыыта буолла. 

Күрэс информационнай технология уонна технологическай урбаан салаатыгар ыччаты өйөөн, эрдэттэн идэҕэ сирдиир туһаайыылары ыытан,  саҥа көлүөнэ ИТ исписэлиистэрин бэлэмнээн, дойдуга ИТ эйгэтин сайыннарар соруктаах ыытыллар.

Ил Дархан Айсен Николаев: “Күрэс 2016 сыллаахха саҕаланарыгар, сыыспат буолахпына, алта уонча оҕо кыттыбыта. Билигин улахан тэрээһин буолла. Бастакы түһүмэххэ 10 тыһ. чугаһыыр үөрэнээччи, устудьуон кыттыбыта, онтон улуустааҕы, куораттааҕы түмүктүүр түһүмэххэ — 2000 кэриҥэ. Уонна 260-ча үөрэнээччи, устудьуон бастыҥы быһаарыыга түмүстэ.

Биһиги күрэспит иллэрээ сылтан федеральнай таһымҥа тахсыбыта икки төгүл үөрүүлээх. Бэйэтин кэмигэр дойду таһымыгар таһаарарга этии киллэрбиппит. Бу күннэргэ 12 эрэгийиэҥҥэ түмүк тэрээһиннэр ыытылла тураллар. Уонна кулун тутар бүтүүтэ Нижнэй Новгородка түмүктүүр түһүмэххэ бастыҥ хамаандалары билиһиннэриэхтэрэ, ол иһигэр биһиги өрөспүүбүлүкэбититтэн биэс хамаанда кыттыаҕа” – диэн эттэ.

Ил Дархан кыттааччыларга ситиһиини баҕарда. Саха сирэ Уһук Илиҥҥэ креативнай индустрияны, ИТ салааны сайыннарыыга биир бастыҥынан буоларын быһыытынан тустаах салааны салгыы сайыннара туруоҕа диэн бэлиэтээтэ.

Күрэс хабар ыыра кэҥээн иһэр. Ол курдук, аан бастакытын Арктика улуустарыгар сүүмэрдиир күрэхтэһиилэр ыытыллыбыттара.

Идэҕэ урутаан бэлэмниир киин дириэктэрэ, СӨ “Мин идэм — ИТ” күрэс суһал ыстаабын салайааччыта  Владислав Хабаров: “Бүгүн Булуҥ, Анаабыр, Өлөөн улуустара кытталлар. Салгыы бырамыысыланнай оройуоннар диэки сыҕарыйан эрэбит. Үс күн устата оҕолор оҥорон таһаарар сорудахтары толоруохтара”, – диэн эттэ.

Быйыл тэрийээччилэр аан маҥнайгытын нэһилиэнньэҕэ анаан кулун тутар 1 күнүгэр “аһаҕас аан” күнүн биллэрэллэр, оскуола үөрэнээччилэригэр уонна устудьуоннарга  маастар-кылаастары ыытыахтара.

Былырыын күрэс “Арассыыйа хакатона” национальнай бириэмийэ иитинэн “Оскуола бастыҥ хакатонунан” ааттанан, РФ Үөрэҕириитин министиэристибэтэ үөрэнээччилэр, устудьуоннар ортолоругар ыытар олимпиадаларын, күрэстэрин официальнай испииһэгэр киирбит. Өрөспүүбүлүкэтээҕи түһүмэх кыайыылаахтарын кулун тутар 2 күнүгэр билиэхпит.