«Мин олорор кыраайым» оонньууну оҕолор астыннылар

Быыбардыыр хамыыһыйалар быраап култууратын үрдэтиигэ үлэни ыыталлар. Бу үлэҕэ кинилэргэ бибилэтиэкэлэр үлэһиттэрэ көмөлөһөллөр диэн СӨ киин быыбардыыр хамыыһыйата иһитиннэрэр.

Үөһээ Халыма улууһун Уһун-Күөл сэлиэнньэтин 111-с №-дээх учаастактааҕы быыбардыыр хамыыһыйатын чилиэннэрэ тыа сирин бибилэтиэкэтин (бибилэтиэкэр Любовь Сергучева) кытта бииргэ оскуола оҕолорун ортотугар «Мин олорор кыраайым» диэн интеллектуальнай оонньууну ыыттылар.

Балаҕан ыйын 9 күнүгэр оонньуу Зырянка орто оскуолатын 10-с кылааһын үөрэнээччилэригэр ыытылынна. Оонньууну бибилэтиэкэ үлэһитэ Нина Дугунова, 115-с №-дээх учаастактааҕы быыбардыыр хамыыһыйа чилиэнэ Изольда Баркова уонна СӨ Киин быыбардыыр хамыыһыйа  сүрүн исписэлиһэ Андрей Хорольский ыыттылар.

Оскуола оҕолоро оонньууттан олус астыннылар, кинилэр төрөөбүт кыраайдарын, бэлитиичэскэй систиэмэ уонна быыбардар тустарынан элбэх саҥаны уонна интэриэһинэйи биллилэр. Оонньуу хас биирдии кыттыылааҕа өйдөбүл бирииһи тутан үөрүүтэ өссө үрдээтэ.