«Мин сахалыы ааҕабын»: улуус планерката уратытык саҕаланна

«Ааҕар  Сунтаар» бырайыак иитинэн, Арассыыйаҕа Учуутал уонна уһуйааччы, Сунтаар улууһугар Төрөөбүт төрүт тыл сылларынан сибээстээн, учуутал туһунан  саха суруйааччыларын айымньыларын дорҕоонноохтук  ааҕыыга «Мин сахалыы ааҕабын» аахсыйа ыытыллар. Бу туһунан улуус дьаһалтатын пресс-сулууспата иһитиннэрдэ. 

Сунтаар улууһун дьаһалтата, хас бэнидиэнньик ахсын сарсыарда 08.30 чаастан, нэдиэлэтээҕи былааны торумнуур мунньаҕы ыытар. Бүгүҥҥү сүбэ мунньах уратытык саҕаланна. Ол курдук, отделлар, управлениелар салайааччылара Бүтүн Арассыыйатааҕы Ааҕыы күнүгэр кыттыыны ыллылар. Манна Николай Габышев «Дьиҥнээх учуутал» кэпсээниттэн быһа тардыыны, тута бэлэмнэниитэ суох, бэрт сэргэхтик, ис хоһоонноохтук, дорҕоонноохтук ааҕан иһитиннэрдилэр. Сахалыы кэпсээннэри, сэһэннэри, хоһооннору ааҕыҥ, тылгыт саппааһын байытыҥ, сахалыы өйү-санааны уһугуннарыҥ диэн улуус дьаһалтата суруйда.