Миниистир Амма урбаанньыттарын кытта көрүстэ

Бу күннэргэ СӨ Урбааҥҥа  уонна туризмҥа миниистирэ Тимур Ханды Амма улууһун урбаанньыттарын кытта көрүстэ.

Миниистир  өрөспүүбүлүкэҕэ урбаан салаатын көрдөрүүлэрин, нолуоктан киириини, туризмы сайыннарыы туһунан билиһиннэрдэ уонна боппуруостарга  эппиэттээтэ. Көрсүһүүнү Амматааҕы “Биисинэс-инкубатор” уонна «Мин биисинэһим» киин тэрийэн ыыттылар.

Миниистир Амма улууһугар урбаанньыттары улаханнык өйүүллэрин туһунан эттэ.  «Бары улуустарга оннук буолбатах, баһылыккыт барыгытыгар биир тэҥник сыһыаннаһан өйүүр» диэн урбаанньыттарга туһаайан бэлиэтээтэ.  Тимур Ханды  улуустарынан урбаан хайдах сайдан иһэрин ырытта. Маныаха Амма улууһа биир бастыҥнар ахсааннарыгар сылдьар эбит. Ол курдук, 2041 киһи урбаан хайысхатыгар үлэлиир  дьарыктанар. Нолуокка үбү киллэрии да  куһаҕана суох. Урбаанньыттар итиии  боппуруоһун, суол оҥоһуутун, туризмы сайыннарыыга үөрэх уо.д.а. суолталаах боппуруос тула санааларын атастастылар.