Миниистир Колокольцев икки саастаах оҕону быыһаабыт полиция сотруднигын наҕараадалаата

РФ Ис дьыалаҕа миниистирэ Владимир Колокольцев  ИДьМ Дьокуускайдааҕы салаатын полиция 2-с нүөмэрдээх отделын ыстаарсай иниспиэктэрэ, полиция лейтенана  Татьяна Иванованы  министиэристибэ  «За смелость во имя спасения» мэтээлинэн  наҕараадалаата. Бу туһунан РФ Ис дьыалаҕа министиэристибэтин бэрэстэбиитэлэ Ирина Волк ТГ ханаалыгар иһитиннэрдэ.

Полиция сотруднига уоппускатын кэмигэр төрөппүттэригэр ыалдьыттыы сылдьан,  күөлгэ тимирэн  эрэр икки саастаах оҕону быыһаабыт.   Татьяна күөл таһыгар мустубут оҕолор айманан эрэллэрин  бэлиэтии көрбүт.  Итиэннэ оҕолор көмөҕө наадыйалларын тута сэрэйбит. Уулуссаҕа сүүрэн тахсан көрбүтэ, ууга кыра кыысчаан  булумахтана сылдьар эбит. Татьяна кыысчааҥҥа көмөлөһөөрү  мас инчэҕэй муостанан сүүрэн иһэн халтарыйан охтон түспүт. Итиэннэ төһө да эчэйдэр, ууга ыстаммыт.  Полицейскай  кырачаан кыыһы ууттан таһааран, төрөппүттэригэр туттарбыт. Бу кэннэ Татьяна мэдиссиинискэй көмөҕө наадыйан, балыыһаламмыт.