Миниистир солбуйааччыта Сунтаар улууһугар үлэлээтэ

Бу күннэргэ Тыа хаһаайыстыбатын миниистирин солбуйааччыта Сахайаана Павлова Бүлүү бөлөх улуустарыгар үлэтин чэрчитинэн сири ньүөлсүтүү, от үүнүүтэ, ыһыы үлэтэ хайдаҕын билсээри Сунтаар улууһун бааһыналарыгар сырытта.

Сунтаарга Килээбий, Чохулаах буолаларыгар «Кириэстээх» хаһаайыстыба подсолнух, эбиэс курдук иҥэмтиэлээх үүнээйилэри ыспыт. Оттон Кириэстээх, Куокуну өттүнээҕи үүнүү, барыта холбоон сыл аайы 3000 туонна кэриҥэ сиилэс бэлэмнэнэр. Тойбохойдор эмиэ урукку сопхуос  саҕанааҕы буолалары сөргүтэн сыл ахсын өлгөм үүнүүнү ылаллар.

«Бородууксуйаларын анал тэрилгэ переработкалаан көтөрдөргө, сибиинньэҕэ, сүөһүгэ аналлаах аһы оҥорон таһаараллар. Иҥэмтэлээх эбии аһылык ынах сүөһү уопсай туругар уонна үүтүн хаачыстыбатыгар сабыдыаллыыра саарбахтаммат. Онон бу эйгэҕэ улахан болҕомто туһаайыллара эрэйиллэр», диэн улуус дьаһалтата бэйэтин телеграм-ханаалыгар суруйар.