“Минньигэс” дьиэ кэргэн лааҕырын оҕолор сөбүлээтилэр

Нам улууһун Ленскэй нэһилиэгэр Виктория Пинигина  ийэтинээн Вероника Ефремовалыын  улуус баһылыга Юрий  Слепцов  граныгар  кыайан, “Минньигэс” дьиэ кэргэн лааҕырын үлэлэтэллэр. 

Баһылык грана  2020-2026  сылларга ыччакка уонна дьиэ кэргэҥҥэ туһуламмыт муниципальнай бырагырааманы олоххо киллэрии чэрчитинэн олохтоммута.

“Нам улууһа”  МТ пресс-сулууспата  иһитиннэрбитинэн,  дьиэ кэргэн лааҕыра 10 оҕону хабан, үлэтин от ыйын 16  күнүттэн  саҕалаабыта. Лааҕыр аһыллыытыгар  Амма кэрэ айылҕатыгар дуоһуйа сынньанан кэлбиттэрэ. Оҕолор 21 күн устата  үлэҕэ —  оҕуруот олордорго, харайарга, күннээҕи аһы (алаадьы, миин, бурдук ас) астааһыҥҥа уһуйуллаллар.

Виктория Сергеевна сарсыардааҥҥы сэрээккэттэн саҕалаан, олоххо куттал суоһаабатын туһугар сэрэхтээх буолууга, бастакы көмөнү оҥорууга лиэксийэлэри ааҕар, эрчийэр. Оттон Вероника Ефремовна туорду, минньигэс аһы астааһыҥҥа маастар-кылаастары ыытар.

Лааҕыр иитиллээччилэрэ, төрөппүттэр оҕо сынньалаҥын уратытык тэрийэр дьоҥҥо  истиҥ махталларын тиэрдэллэр.