“Мир” каарта тас дойдуга үлэлиэҕэ

Арассыыйатааҕы “Мир” каарта систиэмэтэ Иран “Shetab” диэн систиэмэтигэр киирдэ. Бу туһунан “Tasnim” Ираннааҕы информационнай агентство иһитиннэрэр.

Информационнай агентство иһитиннэрбитинэн, билигин Арассыыйатааҕы “Мир” систиэмэтинэн үлэлиир бааннарга Иран каарталарынан солкуобайы устуохха сөп буолбут. Бу бырайыак иккис түһүмэҕинэн Арассыыйа олохтоохторо Ираҥҥа “Мир” систиэмэ каарталарынан туһанар кыахтаныахтара.

Санатан эттэххэ, Арассыыйа бааннарын “SWIFT” систиэмэтиттэн таһаарыахтарыттан, тас дойдуларга Арассыыйа бааннарын каарталарынан туһаныы уустугурбута, ону таһынан бу систиэмэнэн атын дойдуларга харчыны ыытыы ыараабыта. Билигин “Мир” каарта уонча эрэ дойдуга үлэлиир. Ол иһигэр Белоруссия, Казахстан, Азербайджан, Таджикистан, Армения, Вьетнам, Куба бааллар.

Иран – ислам итэҕэллээх дойдулартан аан илиҥҥэ биир сүрүн судаарыстыба. Быйыл тохсунньуттан Иран БРИКС норуоттар икки ардыларынааҕы түмсүү чилиэнинэн киирбитэ. Иран Ирагы, Азербайджаны, Арменияны, Турцияны, Туркменистаны, Афганистаны уонна Пакистаны кытары кыраныыссалаһар. Арассыыйа Каспийскай муоранан Иранынан Индия акыйааныгар тахсар кыахтаах.