Мира Аргунова хартыынатын «Сибиир уоттара» сурунаалга таһаардылар

Саха сирин худуоһунньуга «Дьулуруйар Ньургун Боотур» хартыынатын, Арассыыйа Худуоһунньуктарын сойууһун чилиэнэ Мира Аргунова 1922 сыллаахтан тахсар «Сибиир уоттара» диэн Арассыыйа былыргы литературнай сурунаал бастакы сирэйигэр таһаардылар.

Сурунаал нүөмэригэр омскай суруйааччыта Александр Тихонов суруйбут Мира Аргунова олоҕун уонна айымньытын туһунан очеркалар бэчээттэннилэр.

««Сибиир уоттара» литературнай сурунаала поэзия, проза, кириитикэ, драматургия уонна живопись эйгэтигэр саамай чаҕылхай  айымньылары сырдатар. Айымньыны литература уонна ойуулуур- дьүһүннүүр ускуустуба эйгэтигэр камертонунан ааттыахха сөп. Улахан литературнай альманах уонна очерк ааптарыгар, Арассыыйа биллиилээх суруйааччытыгар Александр Тихоновка махтанабын», — диэн Мира Аргунова кэпсээтэ. Маны таһынан, сэтинньи саҥатыгар кини Арассыыйа икки куораттарыгар, Йошкар- Олаҕа уонна Сочига, персональнай быыстапкалары арыйыаҕа диэн иһитиннэрдэ.

Сэтинньи 1 күнүгэр Мира Аргунова «Диалог культур» норуоттар икки ардыларынааҕы бырайыак чэрчитинэн Марий Эл Өрөспүүбүлүкэтин ойуулуур-дьүһүннүүр ускуустубатын түмэлигэр быыстапкатын билиһиннэриэҕэ. Экспозицияҕа худуоһунньук саха норуотун остуоруйатыгар уонна эпоһыгар анаммыт 20 саҥа айымньылара киирдилэр. Сэтинньи 3 күнүгэр Сочи куорат судаарыстыбаннай заповедник-түмэл филиалыгар Бүтүн Арассыыйатааҕы «Ночь искусств» аахсыйаҕа аналлаах «Любимая страна» диэн персональнай быыстапка аһыллыаҕа. Быыстапкаҕа 84 хартыына туруоруллуоҕа.