Мишустин эксээмэни тэрийэргэ салгыы үлэлэһэллэригэр сорудахтаата

РФ премьер-миниистирэ Михаил Мишустин Рособрнадзор эрэгийиэннэри кытта боруобалаан көрүү эксээмэнин дьиҥнээх эксээмэн ыытыллар усулуобуйатыгар чугас гына арыый киэҥник ыытарга сорудахтаата.  

“Олус элбэх оҕо, төрөппүт сүрүн судаарыстыбаннай эксээмэни, биир кэлим эксээмэни кытта сибээстээх тургутууга эрдэттэн холонон көрүөхтэрин баҕараллар. Биллэн турар, тургутан көрүү усулуобуйата төһө кыалларынан эксээмэҥҥэ чугас буолара ирдэнэр. Маны тэрийиигэ, мин санаабар, өссө да элбэҕи оҥорор наада.

Эрэгийиэннэри кытта бу кыаҕы эрдэттэн көрөр ирдэнэр. Оҕо аан маҥнай эксээмэн туттарар долгуйуута кини көрдөрүүлэрин мөлтөтөр.  Дьэ манна оҕоҕо кыах биэрэр туһугар бары үлэлэһэрбит наада” – диэн Рособрнадзор салайааччыта Анзор Музаевы кытта  көрсүһүүтүгэр Мишустин бэлиэтээбит.

Бэрэссэдээтэли солбуйааччы үөрэнээччилэр күн бүгүн дьиҥнээх эксээмэҥҥэ чугас усулуобуйаҕа  бэйэлэрин тургутан көрөр кыахтара кыра дии саныыр.

Бу туһунан РИА Новости суруйар.