ММА-ҕа Ил Дархан Куубагар 26 күүстээх спортсмен кыттыаҕа

ММА-ҕа Ил Дархан Айсен Николаев Куубагар Таджикистан, Узбекистан, Кыргызстан, Бурятия, Алтай, Новосибирскай, Москва, Дагестан, Иран уонна Саха сирин күүстээх спортсменнара кыттыахтара. Куубакка 26 бөҕөс киирсэрэ былааннанар.

Турнир бу бээтинсэҕэ, атырдьах ыйын 18 күнүгэр, Дьокуускайга «Өрөгөй» успуорка бэлэмнээх буолуу киинигэр ыытыллыаҕа. Бүгүн Дьокуускайга Иркутскайтан уонна Бурятияттан спортсменнар көтөн кэллилэр.

Атырдьах ыйын 17 күнүгэр «Куруһаала» атыы-эргиэн дьиэтигэр 18:00 чаастан турнир пресс-кэмпириэнсийэтэ буолуоҕа.

Саха сириттэн аҕыс байыас кыттыаҕа — Узаир Абдураков, Октябрин Яковлев, Игнатий Андросов, Андрей Лаптев, Федор Огоюкин, Денис Андреев, Григорий Барашков уонна Гавриил Семенов.

Турнир «Eagle FC» диэн UFC чөмпүйүөнэ Хабиб Нургамомедов Лиигатын иитинэн ыытыллыаҕа.