Мобилизацияламмыт дьоммутугар көмөлөһөр ытык иэспит

Саха сириттэн анал байыаннай эпэрээссийэҕэ элбэх киһи мобилизацияланан байыаннай чаастарга баарын туһунан Ил Дархан Айсен Николаев «Якутия 24» ханаал эфиригэр эттэ.

«Биһиги анал байыаннай дьайыыга кытта сылдьар биир дойдулаахтарбытыгар көмөлөһөр ытык иэспит», — диэн кини тоһоҕолоон бэлиэтээтэ.

Биһиэхэ байыаннай сулууспалаахтарбытыгар көмөнү оҥорор Биир кэлим сүрүннүүр киин тэриллэн, Москуба куоракка Бастайааннай бэрэстэбиитэлистибэҕэ баазаланан үлэлиирин кэпсээтэ. Санатан эттэххэ, Биир кэлим киин Тирэх пууннара Крымҥа, Ростовка, Донецкайга бааллар. Нэдиэлэ аайы бу пууннар бэрэстэбиитэллэрэ байыастарбытыгар дойдуларыттан баһыылкалары тириэрдэллэр.

«Бастатан туран, байыаннай сулууспалаахтарбытын кытары сибээстэһэбит, бааһырбыт байыастарбытыгар Москубаҕа баар волонтердарбыт көмөлөһөллөр уонна билигин Саха сириттэн миэдиктэр бөлөхтөрө госпиталларга тиийэн үлэлии сылдьаллар. Биллэн турар, байыаннай чаастары кытары сүбэлэһэн, байыаннай сулууспалаахтарбытын материальнай-техническэй өттүнэн эмиэ хааччыйабыт», – диэтэ Ил Дархан Айсен Николаев.