Мобильнай биригээдэлэр 5 тыһыынча киһини көрдүлэр

Арктикаҕа пилотнай бырайыак быһыытынан үлэлиир мобильнай биригээдэлэр үлэлэрин бастакы түмүгүн таһаардылар. Алта биригээдэ мобильнай быраастара Абый, Аллара Халыма, Орто Халыма, Усуйаана улуустарыгар 31 сэлиэнньэни хабан үлэлээтилэр.

— Пилотнай бырайыак Арктика улуустарыгар көдьүүстээҕин көрдөрдө. Бастакы ыйга быраастар 5 тыһыынча кэриҥэ киһини көрдүлэр-иһиттилэр. Дьон-сэргэ биһирээтэ. Суола-ииһэ суох ыраах сирдэргэ маннык ньыма ыарыыны эрдэттэн буларга көмөлөөх. Онон киһи олоҕун да быыһыыр кыахтаах, — диэн Айсен Николаев бэлиэтээтэ.

Олунньу ый саҕаланыаҕыттан быраастар 4912 киһини, ол иһигэр 858 оҕону көрбүттэр. Ол түмүгэр 524 киһини Дьокуускайга сиһилии көрдөрүнэ баралларыгар сүбэлээбиттэр, 1254 киһини балыыһаҕа киллэрбиттэр. Улуустар киин балыыһалара сытар ыарыһахтарын базаларын саҥартылар, өрөспүүбүлүкэтээҕи килииникэлэргэ барар дьону бэлэмнээтилэр, араас сүбэни-аманы ыллылар.

— Быраастар маршруттара ыраах сытар нэһилиэнньэлээх пууннарга тиийэргэ ымпыгар-чымпыгар тиийэ оҥоһуллубута, бөртөлүөтүнэн, вездеходунан айаннаан тиийбиттэрэ. Тэрээһиннээхтик көрсүбүттэригэр олохтоох дьаһалталарга, балыыһалар үлэһиттэригэр, нэһилиэнньэҕэ быраастар махтаналлар. Оттон ыраах, суола-ииһэ суох сэлиэнньэлэр олохтоохтор быраастарга, өрөспүүбүлүкэ салалтатыгар махталлара муҥура суох, — диэн доруобуйа харыстабылын миниистирэ Лена Афанасьева эттэ.

Мобильнай биригээдэлэр өрөспүүбүлүкэтээҕи кииннэрин логистическай киинэ (РЦМБ) аны кулун тутарга Дьааҥы, Эдьигээн, Муома, Аллайыаха, Эбээн-Бытантай улуустарыгар барар маршруту оҥоро сылдьаллар. Мобильнай дуоктардар муус устар бүтүөр диэри Арктика 13 улууһугар барыларыгар сылдьыахтара.

Ил Дархан, бырабыыталыстыба дьаһалтатын пресс-сулууспата.