Мобильнай биригээдэлэр уустук суоллаах- иистээх атын улуустарга эмиэ тиийэллэр

Мобильнай биригээдэлэр Саха сирин Уһук хоту оройуоннарын олохтоохторугар хаачыстыбалаах мэдиссиинэ көмөтүн оҥорор үлэлэрин салгыыллар. Бүгүҥҥү күҥҥэ медиктэр номнуо 2 838 киһини көрдүлэр диэн СӨ Доруобуйа харыстабылын министиэристибэтэ иһитиннэрэр.

Быйылгыттан мобильнай дуоктардар сылдьар сирдэрин кэҥэттилэр, Арктикаҕа эрэ буолбакка, өрөспүүбүлүкэ уустук суоллаах-иистээх атын сирдэрин эмиэ хабан үлэлээн эрэллэр. Өрөспүүбүлүкэ үгүс олохтоохторугар быраастар маннык тиийиилэрэ үөрүүлээх түгэнинэн буолар. Ньурба улууһун Хорула нэһилиэгин олохтооҕо Надежда Степанова бэйэтин махталын биллэрэр: «Урут биһиэхэ мобильнай биригээдэлэр кэлбэт этилэр. Билигин манна быраастар бүтүн хамаандалара кэлэн, дьону-сэргэни көрдө уонна инникитин да мэлдьи кэлэллэригэр эрэнэбит».

Өлөөн улууһа: Тохсунньу 22 күнүттэн олунньу 3 күнүгэр диэри 11  исписэлиистэн турар улахан дьону көрөр биригээдэ түөрт нэһилиэккэ: Ээйиккэ, Дьилиҥдэҕэ, Харыйалаахха, Оленекка көрдө. Уопсайа 574 ыарыһаҕы көрдүлэр.

Анаабыр улууһа:Тохсунньу 24 күнүттэн олунньу 5 күнүгэр диэри оҕо биригээдэтэ икки нэһилиэккэ: Сааскылаахха, Үрүҥ Хайаҕа үлэлээтэ. 11 быраас уопсайа 546 киһини көрдө.

Аллараа Халыма: Тохсунньу 22 күнүттэн олунньу 5 күнүгэр диэри элбэх хайысханан үлэлиир мобильнай биригээдэ Черскэй, Походскай, Андрюшкино уонна Колымское нэһилиэктэргэ сырытта. Быраастар уопсайа 686 киһини көрдүлэр.

Бүлүү улууһа: Тохсунньу 31 күнүттэн Ньурба улууһугар 9 исписэлиистээх биригээдэ үлэлии сылдьар, билиҥҥитэ уопсайа 761 киһини көрдө. Олунньу 14 күнүгэр диэри медиктэр Ньурба улууһун өссө 9 нэһилиэнньэлээх пуунун (Маалыкай, Хатыы, Малдьаҕар, Чуукаар, Өҥөлдьө, Хорула, Марха, Киров), ону сэргэ Сунтаар улууһун Туойдаах уонна Үөһээ Бүлүүу улууһун Туобуйа нэһилиэктэрин хабар былааннаахтар.

Нерюнгри оройуона: Олунньу 4 күнүттэн 9 быраастан турар биригээдэ Нерюнгри оройуонугар үлэлии сылдьар, уопсайа 271 киһини көрдүлэр. Олунньу 12 күнүттэн бөлөх Алдан оройуонун ыраах сытар – Угайаан, Кутана уонна Чагда сэлиэнньэлэригэр үлэлиэҕэ.

Оттон стоматологтар туспа бөлөхтөрө тохсунньу 30 күнүттэн Эбээн- Бытантай улууһугар көмөнү оҥороллор. Тэҥинэн атын сирдэргэ сайҥа айаннарга бэлэмнэнии барар: оҕо биригээдэлэрэ Өлөөн уонна Эбээн-Бытантай улуустарыгар, оттон улахан дьон биригээдэлэрэ – Орто Халыма, Аллайыаха, Дьааҥы уонна Муома улуустарыгар айанныахтара.