2025 сылга мобильнай быраастар Саха сирин уустук суоллаах, ыраах сытар сирдэринэн  тиийиэхтэрэ

2025 сылга мобильнай биригээдэлэр быраастара Арктика оройуоннарынан эрэ буолбакка, Саха сирин уустук суоллаах, ыраах сытар нэһилиэнньэлээх пууннарын эмиэ хабыахтара.

Бу туһунан Доруобуйа харыстабылын миниистирэ Лена Афанасьева иһитиннэрдэ.

«Өрөспүүбүлүкэтээҕи мобильнай биригэдэлэр киинэ биһиги өрөспүүбүлүкэбит Уһук Хоту оройуоннарын олохтоохторугар анал мэдииссиинэ көмөтүн биэрэн, иккис сылын таһаарыылаахтык үлэлиир. Биллэн турар, миэдиктэр көһө сылдьар бирэгээдэлэрин салгыы сайыннарар былааннаахпыт. Тоҕо диэтэххэ, атын да уустук суоллаах, ыраах сытар нэһилиэктэр олохтоохторо маннык бырайыагы олоххо киллэриини эрэйэллэр», — диэн Лена Афанасьева бэлиэтээтэ. Быйыл быраастар Саха сирин 13 Арктика оройуоннарыгар мэдиссиинэ көрүүлэрин ыыттылар. 2025 сылтан миэдиктэр Алдан, Өймөкөөн, Кэбээйи, Бүлүү, Үөһээ Бүлүү, Сунтаар, Уус Алдан оройуоннарын нэһилиэнньэлээх пууннарыгар тиийиэхтэрэ.