«Мобильнай быраастар» биригээдэлэрэ Ленскэйгэ үлэлииллэр

От ыйын 20 күнүттэн “мобильнай быраастар” өрөспүүбүлүкэтээҕи биригээдэлэрэ Ленскэй улууһугар үлэлии сылдьаллар.

Бөлөххө терапевтары таһынан невролог быраас уонна ультразвугунан ис ыарыылары чинчийэр исписэлиис баар. Бүгүҥҥү туругунан, улууска 182 киһи доруобуйатын көрбүттэр.

Өрөспүүбүлүкэтээҕи доруобуйа уонна профилактика киинин кылаабынай бырааһа Алена Никитина этэринэн, быраастар бу күннэргэ Ленск, Витим уонна Пеледуй олохтоохторун чинчийэр былааннаахтар.

Санатан суруйдахха, Ил Дархан Айсен Николаев сорудаҕынан Арктика зонатыгар бастакы мэдиссиинэ көмөтүн саҥа моделын пилотнай бырайыага кэҥээбитэ. Бу бырайыак чэрчитинэн тэриллибит “мобильнай быраастар” ыраах уонна уустук суоллаах-иистээх нэһилиэктэргэ тиийэн дьон-сэргэ доруобуйатын чинчийэллэр, хамыыһыйа ыыталлар, ыспыраапкалары оҥороллор, олохтоох быраастарга көмөлөһөллөр.