«Мобильнай быраастар» бырайыагы Арассыыйаҕа тарҕатыахтара

Мобильнай биригээдэлэр өрөспүүбүлүкэтээҕи кииннэрин бырайыага Уһук Илиҥҥэ уонна Арктикаҕа инники күөҥҥэ сылдьар бырайыак быһыытынан билинилиннэ. Бу бырайыагы атын эрэгийиэннэргэ тарҕатыы былаана бара турар диэн «Россия 24» тэлэбиидэнньэ ханаалыгар «Прямой разговор» биэриигэ Ил Дархан Айсен Николаев иһитиннэрдэ.

«Мобильнай мэдиссиинэ биригээдэлэрин  бырайыактарын салгыы сайыннарыахпыт. Кэнники үс сылга мобильнай быраастар 100 тыһыынча кэриҥэ киһини көрдүлэр. Бу бырайыак, саамай сүрүнэ, дьон доруобуйатын тупсарарга чахчы көмөлөһөр. Бырайыагы атын эрэгийиэннэргэ туһанарга сүбэлииллэр», — диэтэ Айсен Николаев.

Мобильнай биригээдэлэр өрөспүүбүлүкэтээҕи кииннэрин быраастара 2025 сылга 42 000-тан тахса киһини бэрэбиэркэлээтилэр. 2024 сылга холоотоххо, бу көрдөрүү 19,5% элбээбит.

Мобильнай быраастар 2025 сылга 87 сырыыны оҥордулар, өрөспүүбүлүкэ 13 Арктическай оройуонун уонна 15 суола-ииһэ суох нэһилиэнньэлээх пууннарын хабан туран, Арктика бөлөҕөр киирбит 89 нэһилиэнньэлээх пуун бары олохтоохторо доруобуйаларын бэрэбиэркэлэннилэр.

2025 сылга мобильнай быраастар 97 тыһыынча кэриҥэ ыарыыны булбуттар, бу ааспыт сылга холоотоххо, 25,6%-нан элбээбит. Саҥа быһаарыллыбыт ыарыылары 10 000-тан тахса түбэлтэҕэ буллулар, 2024 сылга холоотоххо, 23,3% үрдээһин. Бу үрдээһин мобильнай үлэ кыраапыгар суола-ииһэ суох нэһилиэнньэлээх пууннары киллэрииттэн тахсар, ону тэҥэ, сайыҥҥы халаан кэнниттэн Абый уонна Өймөкөөн оройуоннарыгар, онно 80-тан тахса нэһилиэнньэлээх пууҥҥа мэдиссиинэ көмөтүн оҥордулар.

«Өрөспүүбүлүкэтээҕи мобильнай биригээдэлэр кииннэрэ» бырайыак  Айсен Николаев сорудаҕынан үһүс сылын үлэлиир.

2025 сылтан мобильнай биригээдэлэр үлэлиир эйгэлэрэ кэҥээбит. Арктика улуустарыгар эрэ буолбакка, ыраах сытар нэһилиэнньэлээх пууннарга эмиэ сылдьаллар. Элбэх хайысхалаах бөлөхтөр мэдиссиинискэй чинчийиилэри ыыталлар, ыарыһахтары анал эмтээһиҥҥэ, ол иһигэр үрдүк технологиялаах мэдиссиинискэй көмөҕө талан ылаллар уонна салгыы көмөнү оҥороллор.

Өрөспүүбүлүкэҕэ «Мобильнай хирургическай киин» бырайыак эмиэ 2024 сылтан олоххо киирдэ. Киин 2-№-дээх өрөспүүбүлүкэтээҕи балыыһаҕа (ЦЭMП) үрдүк технологиялаах хирургическай көмөнү тупсарарга анаан тэриллибитэ.

Бу бырайыак олоххо киирбит икки сылыгар мобильнай хирурдар 40-тан тахса сырыыны оҥордулар, 5000-тан тахса киһини көрдүлэр уонна 1500-тэн тахса эпэрээссийэни оҥордулар.

Сиһилии: https://www.sakha.gov.ru/news/18765