«Мобильнай доктордар» Дьааҥы улууһун 1000-н тахса оҕотун көрдүлэр

Ил Дархан Айсен Николаев Арктика улуустарыгар мэдиссиинэ анал көмөтүн оҥоруу бырайыага үлэтин салҕыыр.

Ол курдук от ыйын 3 күнүгэр Дьааҥы улууһугар үлэлээн бүтэн өрөспүүбүлүкэтээҕи мобильнай биригээдэ киинин оҕо быраастара кэллилэр. Мобильнай биригээдэ бэс ыйын 6 күнүттэн от ыйын 3 күнүгэр диэри Дьааҥы улууһун бары нэһилиэктэрин кэрийэннэр оҕолору көрдүлэр.

Бу туһунан Ил Дархан пресс-сулууспата иһитиннэрэр.

«Биһиги быраастарбыт Дьааҥы оройуонун 21 нэһилиэгэр сылдьан, 1093 оҕону көрдүлэр. Бу Арктика улууһун нэһилиэнньэлээх пууннарын 100% хаптылар», – диэн доруобуйа харыстабылын миниистирэ Лена Афанасьева кэпсээтэ.

Мобильнай биригээдэ иһигэр киирэн 12 оҕо бырааһа: педиатр, невролог, офтальмолог, оториноларинголог, гинеколог, хирург-уролог, травматолог-ортопед, стоматолог, кардиолог, психиатр, ультразвуковой диагностика, ону таһынан орто мэдиссиинэ персонала үлэлээтэ.

Миэстэтигэр оҕолору анал испэсэлиистэр чинчийдилэр уонна төрөппүттэргэ оҕону чэбдигирдиигэ сүбэлэр бэрилиннилэр.

«Бу сырыы түмүгүнэн 46 оҕо диспансернай учуокка ылылыннылар, быраастар кинилэр доруобуйаларын кэтээн көрүөхтэрэ уонна салгыы бэрэбиэркэлиэхтэрэ. Аан бастаан 766 оҕо стомотолог көмөтүн ылла. 1580 оҕоҕо нейросонография быһыытынан УЗИ оҥоһулунна. Маннык оҕону көрөр мобильнай биригээдэлэр Арктика бары улуустарыгар тиийэн үлэлиэхтэрэ», – диэн Лена Афанасьева бэлиэтээн эттэ.