«Мобильнай дуоктардар» арктическай оройуоннарга 11 тыһыынча кэриҥэ киһини көрдүлэр
Бүгүҥҥү туругунан «Мобильнай дуоктардар» көмөлөрүнэн 10 840 киһи туһанна. Миэдиктэр биригээдэлэрэ өрөспүүбүлүкэ 68 арктическай нэһилиэнньэлээх пууннарыгар үлэлээтэ.
Туһааннаах биригээдэр көмөлөрүнэн Абый, Муома, Дьааҥы, Аллайыаха, Эбээн Бытантай оройуоннарыгар чэпчэтиинэн туһанар гражданнарга 230 киилэ эмп-том илдьиллибитин туһунан Доруобуйа харыстабылын министиэристибэтэ иһиттиннэрдэ.
Мобильнай биригээдэлэр узкай исписээлинэстээх эмчиттэринэн хааччыллыбыттарын таһынан, УЗИ, ЭКГ аппарааттаахтар, холестерины, сахаары бэрэбиэркэлиир, анаалыс, ол иһигэр ИФА, онкомаркер ылар тэриллээхтэр.
Ил Дархан Айсен Николаев көҕүлээһининэн олоххо киллэриллибит пилотнай бырайыак Арктика улуустарыгар көдьүүстээҕин көрдөрдө. Бастакы ыйга быраастар 5 тыһыынча кэриҥэ киһини көрбүттэрэ. Суола-ииһэ суох ыраах сирдэргэ маннык ньыма ыарыыны эрдэттэн буларга көмөлөөх.
Сообщить об опечатке
Текст, который будет отправлен нашим редакторам: