«Мобильнай дуоктардар» Арктикаҕа үлэлииллэр

«Мобильнай дуоктардар» Арктика оройуоннарын олохтоохторугар мэдиссиинэ көмөтүн оҥороллорун салгыыллар. Билиҥҥитэ 4 улууска 1500-тан тахса киһини көрдүлэр диэн доруобуйа харыстабылын министиэристибэтэ иһитиннэрэр. 

Булуҥ улууһугар 13 исписэлиистээх, элбэх хайысхалаах биригээдэ 320 киһини, ол иһигэр 30 оҕону көрдө-иһиттэ. Миэдиктэр балаҕан ыйын 20 күнүгэр диэри үлэлииллэр.

Дьааҥыга 14 исписэлиистээх оҕо биригээдэтэ 732 оҕону көрдө-иһиттэ. Эмиэ балаҕан ыйын 20 күнүгэр диэри үлэлииллэр.

Аллайыахаҕа 13 исписэлиистээх оҕо биригээдэтэ 48 оҕону көрдө-иһиттэ. Балаҕан ыйын 25 күнүгэр диэри өссө биэс нэһилиэккэ сылдьар былааннаахтар.

Ил Дархан сорудаҕынан, мобильнай биригээдэлэр 2023 сыл олунньутуттан Арктикаҕа үлэлээн саҕалаабыттара. Бу кэмтэн ыла мобильнай биригээдэлэр Арктика 13 оройуонугар, 89 нэһилиэнньэлээх пуунугар үлэлээтилэр. Маннык үлэ көдьүүстээҕэ, дьоҥҥо туһалааҕа көһүннэ.