Мобильнай хирурдар муус устарга үс улууска эпэрээссийэлэри оҥордулар

Өрөспүүбүлүкэтээҕи 2 №-дээх балыыһа хирургияҕа киинин мобильнай биригээдэтэ муус устарга  өрөспүүбүлүкэ 3 улууһугар үлэлээтэ.

Ол курдук, Ньурбаҕа (муус устар 2-13 күннэригэр), Нерюнгрига (муус устар 13-15 күннэригэр)  уонна Мииринэйгэ (муус устар 22-26 күннэригэр) нэһилиэнньэ доруобуйатын көрдүлэр.

Үс сырыы кэмигэр хирургия мобильнай киинин исписэлиистэрэ 85 эмтэнээччи доруобуйатын чинчийдилэр, 49 суһал орооһуу оҥоһулунна (ол иһигэр, иэччэх сүһүөҕэр 11 эндопротезирование,   9 лапароскопическай холецистэктомия, ис тэһэҕэһэр  2 пластика,  18 ринопластика, 7 ангиография, 1  баллоннай ангиопластика , 1 коронарография).

Ньурба уонна Мииринэй улуустарыгар хирург-быраастарга  маастар-кылаастары ыыттылар.

Эпэрээссийэлэр кэннилэриттэн ыарыһахтар олохторун хаачыстыбата биллэ тубуста. Эпэрээссийэ кэнниттэн эмчиттэри кытары видео-кэмпиэринсийэнэн сибээстэһэн, сүбэ-ама биэрэллэр.

Хирургия мобильнай киинин быраастара сотору кэминэн Горнай уонна Чурапчы улуустарыгар барарга былааннаналлар.