Мобильнай хирурдар Нерюнгригэ 30 эпэрээссийэни оҥордулар

Өрөспүүбүлүкэтээҕи 2 №-дээх балыыһа-Мэдиссиинэ суһал киинин Хирургияҕа мобильнай киинэ тохсунньу 16-20 күннэригэр Нерюнгри улууһугар киэҥ хабааннаах үлэни ыытта.

Быраастар биригээдэлэригэр 13 исписэлиис: 8 быраас (кардиолог, невролог, тымыр хирура, травматолог, травматолог-ортопед, анестезиолог-реаниматолог, рентген-хирург) уонна мэдиссиинэ орто сүһүөх звенотун 4 исписэлииһэ (эпэрээссийэ 3 сиэстэрэтэ, 1 медбрат-анестезист) киирбитэ.
Нерюнгри Оройуоннааҕы киин балыыһата бэлэмнэнии түһүмэҕэр элбэх үлэни ыытта. Ол түмүгэр мобильнай биригээдэ хирург-быраастара суһал эмтэниигэ көрдөрүүлэри эрдэттэн  быһаарбыттара.
Кардиологтар 68 киһини көрбүттэриттэн 35-һэ Өрөспүүбүлүкэтээҕи 2 №-дээх балыыһаҕа  эбии дириҥник көрдөрүнэргэ уонна эмтэнэргэ ыытылынна.
Неврологка 80 киһи көрдөрбүтүттэн 7 киһи неврология отделениетыгар (рассеянный склероз) көрдөрүнэр, 1 эпилепсиялаах ыарыһах Өрөспүүбүлүкэтээҕи 2 нүөмэрдээх балыыһа сытан эмтэнэр  буолла.
40 киһи тымыр хируругар бэрэбиэркэлэннэ. Онтон 6 ыарыһах ол күн Нерюнгри Оройуоннааҕы киин балыыһатын хирургияҕа отделениетыгар эмтэнэ киирдэ.
Ити курдук,  өрөспүүбүлүкэ доруобуйатын харыстабылын устуоруйатыгар  чинчийии рентгенэндоваскулярнай ньымалара, улахан тымырдарга эндопротезирование Оройуоннааҕы киин балыыһатын усулуобуйатыгар  аан бастаан оҥоһулуннулар. Бу ньымалар ыарыыны быһаарыы уонна эмтээһин үрдүк технологиятыгар киирсэллэр. Нерюнгри балыыһатыгар эндоваскулярнай рентген-хирург ангиографиялары, 2 ыарыһахха ангиопластикалары, травматолог-ортопедтар 5 эндопротезирование эпэрээссийэлэрин аан бастаан оҥордулар.
Проктолог-быраас 16 киһи туругун бэрэбиэркэлээтэ, онтон  6 ыарыһах хирургия отделениетыгар эпэрээссийэлэннэ.

Ыарыһахтар бары үтүөрэн дьиэлэригэр таҕыстылар. Эпэрээссийэлэр ситиһиилээхтик аастылар, эндопротезирование оҥорторбут ыарыһахтар бэйэлэрэ хаамарга үөрэннилэр..
Эмчиттэр биригээдэлэрэ тиһигин быспакка Оройуоннааҕы киин балыыһаларга барыахтара  уонна онно хирургия анал көмөтүн оҥоруохтара. Ону таһынан Оройуоннааҕы балыыһа  хирурдарыгар  маастар-кылаастары көрдөрүөхтэрэ.
Хирургия мобильнай биригээдэтэ аныгыскыга Алдан оройуонугар бараллара былааннанар.

БЫҺААРЫЫ:
«Хирургия мобильнай киинэ» инновация бырайыага РФ бэрэсидьиэнэ Владимир Путин көҕүлээбит «Доруобуйа харыстабыла» национальнай бырайыагын уонна Ил Дархан Айсен Николаев «Саха Өрөспүүбүлүкэтигэр уопсастыба доруобуйатын бөҕөргөтүү уонна доруобуйа харыстабылын систиэмэтин сайыннарыы стратегическай хайысхаларын туһунан» ыйааҕар быһаарыллыбыт соруктар көмөлөрүнэн олоххо киирдэ.
Бырайыагы олоххо киллэрэргэ СӨ Доруобуйа харыстабылын министиэристибэтэ, СӨ Страховка территориятааҕы пуондата Өрөспүүбүлүкэтээҕи 2 №-дээх балыыһаны кытары бэлэмнэнии улахан үлэтин ыыттылар.