Мобильнай хирурдар Уус Алдан, Мэҥэ Хаҥалас улуустарыгар үлэлииллэр

Өрөспүүбүлүкэтээҕи  2 №-дээх балыыһа-Мэдиссиинэ суһал киинин хирургияҕа мобильнай отделениета үлэтин  муус устар 6 күнүттэн Уус Алдан уонна Мэҥэ Хаҥалас улуустарын Оройуоннааҕы киин  балыыһаларыгар саҕалаата.

Хирурдар манна муус устар 14 күнүгэр диэри үлэлиэхтэрэ.

Уус Алдаҥҥа тиийбит биригээдэ састаабыгар хирург, оториноларинголог, анестезилог-реаниматолог, нейрохирург, эпэрээссийэ сиэстэрэтэ уонна  анестезист-сиэстэрэ бааллар. Онтон Мэҥэ Хаҥалас улууһугар травматолог-ортопедтар биригээдэлэрэ үлэлиир.

«46 былааннаммыт эпэрээссийэттэн икки күн иһигэр 18  эпэрээссийэни оҥордубут (12 септопластик, 3 лапароскопическай холецистэктомия,  1 краниопластика). Травматолог-ортопедтар 8 эпэрээссийэ былааннаммытыттан таас уҥуоҕар иккини   оҥордулар”, — диэн мобильнай хирургия отделениетын салайааччыта Максим Макиевскай иһитиннэрдэ.