«Мобильнай луохтуурдар» Арктика улуустарыгар үлэлииллэр

Балаҕан ыйыгар «мобильнай луохтуурдар» Арктика улуустарыгар үлэлэрин салҕыыллар. Ол курдук балаҕан ыйын 11 күнүттэн эмчиттэр Дьааҥы улууһугар үлэлии сылдьаллар. Манна нэһилиэнньэни 100% хабар былааннаахтар.

Балаҕан ыйын 18 күнүгэр Оһохтоох, Сайдыы, Чэримчэ, Үөһээ Дьааҥы бөһүөлэктэригэр сырыттылар. Барыта 254 киһини, ол иһигэр 72 оҕону көрдүлэр диэн СӨ Бырабыыталыстыбатын пресс-сулууспата иһитиннэрэр.

Балаҕан ыйын 14 күнүгэр элбэх хайысханан үлэлиир биригээдэ Аллайыаха улууһугар үлэлиир.

Нэһилиэнньэни көрүүнү Русскай Устьеттан саҕалаатылар, салгыы Нычалаах, Оленегорскай уонна ити хайысхатынан баар бары нэһилиэктэри хабан үлэлиэхтэрэ. Барыта 151 киһи, ол иһигэр 60 оҕо көрдөрүннэ.

Эмиэ итинник биригээдэ балаҕан ыйын 14 күнүттэн Усуйаана улууһугар үлэлиир. Кинилэр үлэлэрин саамай кытыы сытар Уйаандьы, Хаһааччыйа бөһүөлэктэриттэн саҕалаабыттара, салгыы Усуйаанаҕа, Аллараа Дьааҥыга тиийиэхтэрэ. Барыта 192 киһи, ол иһигэр 32 оҕо көрдөрүннэ.

Балаҕан ыйын 18 күнүгэр икки биригээдэ Абый уонна Булуҥ улуустарыгар көттө. Оттон балаҕан ыйын 19 күнүгэр оҕо быраастарын элбэх хайысхалаах биригээдэтэ Аллараа Халыма улууһугар көтөрө былааннанар.

Мэдиссиинэ үлэһиттэрин мобильнай биригээдэлэрин олорор сирдэрин уонна астарын-үөллэрин тэрийиигэ муниципальнай тэрээһиннэр, балыыһалар, нэһилиэнньэ улахан көмөнү оҥорор.

Миэдиктэр дьон доруобуйаларын туругунан, инструментальнай-диагностыыр чинчийиини: УЗИ, ЭКГ, холтеровскай кэтээн көрүүнү оҥороллор. Биир сүрүн хайысханан эрдэ кэтэбилгэ ылбыт ыарыһахтарын көрүү, эмтээһин буолар.