Модуттан 1,5 тыһыынча куб бөҕү тиэйдилэр

Модут сэлиэнньэтиттэн бырабыыталыстыба суһал бөлөҕө 1,5 тыһыынча куб бөҕү тиэйдэ. Бу туһунан олох-дьаһах хомунаалынай хаһаайыстыбатын, энэргиэтикэ миниистирин солбуйааччы Сергей Киров иһитиннэрдэ. 

Модукка 162 тэлгэһэ, 121  дьиэ, 2 социальнай эбийиэк ууга барбыт. Ханааллары хаһан, мотопомпанан ууну оборторон, тэлгэһэлэргэ мунньуллубут бөҕү-сыыһы хомуйан, барыта 1,5 тыһыынча кубу тиэйдилэр.

Бу суһал бөлөххө олох-дьаһах хомунаалынай хаһаайыстыбатын, энэргиэтикэ, тутуу, тыа хаһаайыстыбатын, тырааныспар эйгэтин үлэһиттэрэ бааллар. Кинилэргэ волонтердар көмөлөһөллөр.

Гуманитарнай көмө кэлэ турар. «Якутия» ФАПК 1,5 туонна ыраас ууну аҕалбыта. Бородуукта, суорҕан, матараас, сыттык, наадалаах тэрил аҕаллылар.

Ил Дархан сорудаҕынан халаантан ордук эмсэҕэлээбит 6 сэлиэнньэни чөлүгэр түһэрэргэ куратордар анаммыттара. 

Ил Дархан, бырабыыталыстыба пресс-сулууспата.