Моҕоллой сайылыкка ыанньыксыттар күрэхтэстилэр

Саха сирин Тыатын хаһаайыстыбатын уонна ас-үөл бэлиитикэтин министиэристибэтэ тыа хаһаайыстыбатын идэлэригэр анаммыт куонкурустары кэмиттэн кэмигэр ыытар үтүө үгэстээх.

Былырыын Бүлүүгэ зоотехниктар куонкурустара буолбута. Аҕыйах хонуктааҕыта XX үйэ рекордсмен ыанньыксыта Павел Петрович Шарин 70 сааһыгар анаммыт XXV өрөспүүбүлүкэтээҕи куонкурус Мэҥэ Хаҥалас улууһун Төхтүр сэлиэнньэтин Моҕоллой сайылыкка ыытылынна.

Бу күрэххэ тоҕус улуустан уонна Дьокуускай куораттан кытыннылар.

СӨ тыатын хаһаайыстыбатын миниистирин солбуйааччы Сахаяна Павлова киирии тылыгар бэлиэтээбитинэн, бу куонкурус идэни дэгиттэр баһылааһыҥҥа анаммыт күрэхтэһии эрэ буолбатах. Ол курдук, бу сүөһү иитиитин аныгы технологияларын туһаныыга уопут атастаһар былаһаакканан буолар.

— Бүгүн биһиги аатырбыт ыанньыксыттар Павел Петрович Шарин, Михаил Николаевич Готовцев уонна Владимир Африканович Михайлов үтүө үгэстэрин салгыыбыт. Сүөһү иитиитигэр үлэлиир аныгы көлүөнэ исписэлиистэри өйүүбүт, — диэтэ Сахаяна Павлова.

Үгэс курдук, кыттааччылар бастаан түөрүйэни билиигэ тест толордулар. Онтон дьиҥ быраактыкаҕа сатабылларын тургуттулар. Ол курдук, ынах ыыр аппарааты ыстылар, хомуйдулар, массыынанан ыаһын технологиятын хайдах тутуһалларын көрдөрдүлэр.

Татьяна Десяткина — муҥутуур чөмпүйүөн

Түмүккэ, Мэҥэ Хаҥалас улууһуттан “Тумул” ТХПК эпэрээтэрэ Татьяна Десяткина массыынанан ыаһын эпэрээтэрдэрин өрөспүүбүлүкэтээҕи куонкурустарын муҥутуур чөмпүйүөнүнэн буолан, трициклинэн наҕараадаланна.

Кини Владимирскай уобаласка атырдьах ыйын 26–29 күннэригэр ыытыллар Бүтүн Арассыыйатааҕы 29‑с куонкуруска Саха сирин чиэһин көмүскүөҕэ.

45‑гэр диэри саастаахтарга Василий Дмитриев (“Бөтүҥ” ТХПК) бастаата. Киниэхэ “REGULMOTO” матасыыкылы туттардылар.

Иккис миэстэҕэ Сунтаар улууһуттан “Кириэстээх” кэпэрэтиип массыынанан ыаһын эпэрээтэрэ Валерий Генеров тахсан, наҕараада быһыытынан мопеды ылла.

Хаҥалас улууһуттан “Туймаада” Эко-пиэрмэ ХЭУо эпэрээтэрэ Мария Саввина үһүс миэстэҕэ таҕыста уонна бэлисипиэтинэн наҕараадаланна.

45 үөһээ саастаахтарга Мэҥэ Хаҥалас улууһуттан “Хорообут” ХЭУо ыанньыксыта Мария Чугунова бастаата. Киниэхэ үөрүүлээх быһыыга-майгыга трицикл туттардылар.

Аатырар “Бөртө сылгы собуота” ХЭУо эпэрээтэрэ Николай Потапов иккис миэстэни ылла. Онон Хаҥалас улууһун бастыҥ ыанньыксыта холодильниктаах дьиэлээтэ.

Амма улууһун “Бөтүҥ” кэпэрэтиибин ыанньыксыта Мария Никитина үһүс бочуоттаах миэстэҕэ тиксэн, тоҥорор ларь хаһаайынынан буолла.

Успуонсардар көмөлөрүнэн

Кыайыылаахтарга наҕараадалары тыа хаһаайыстыбатын миниистирин бастакы солбуйааччы Анна Стручкова ытыс тыаһын ортотугар туттарда.

“Бу куонкурус сүөһү иитиитин салаатын үлэһиттэригэр сүгүрүйүүнү кэрэһилиир. Муҥутуур кыайыылаахпыт Татьяна Десяткина Бүтүн Арассыыйатааҕы түһүмэххэ өрөспүүбүлүкэбит аатын көмүскүөҕэ”, — диэтэ кини кыттыылаахтарга туһаайан.

Моҕоллой сайылыкка ыытыллыбыт тэрээһин үтүө түмүктээх буоларыгар успуонсардар улахан көмөлөөхтөр. Онон кинилэргэ тустаах министиэристибэ дириҥ махталын биллэрдэ. Ол курдук, Нөмүгүтээҕи килиэп собуота “НХЗ ГРУПП” (генеральнай дириэктэр Вячеслав Анатольевич Нестеров), “Туймаада Агрохолдинг” АУо (генеральнай дириэктэр Петр Семенович Ефремов), бааһынай хаһаайыстыба баһылыктара Ньургун Владимирович Габышев (Мэҥэ Хаҥалас), Арыйаан Захарович Винокуров (Нам улууһа), “Тумул” кэпэрэтиип (бэрэссэдээтэл Таисия Васильевна Десяткина) уонна “Алаас-ас” ТХПК (бэрэссэдээтэл Светоний Геннадиевич Шестаков) успуонсардаатылар.

“Эр дьон кыттыбыттарыттан үөрдүм”

Павел Петрович Шарин, Ленинскэй хомсомуол бириэмийэтин лауреата, Үлэ Албан аатын үһүс истиэпэннээх уордьан, “Хотугу Сулус” уордьан кавалера, СӨ тыатын хаһаайыстыбатын үтүөлээх үлэһитэ, “Гражданскай килбиэн” анал бэлиэ хаһаайына, Арассыыйа уонна Саха сирин агро-бырамыысыланнаһын комплексын бочуоттаах үлэһитэ, 20‑с үйэ чулуу ыанньыксыта:

— Массыынанан ыаһын эпэрээтэрдэрин XXV өрөспүүбүлүкэтээҕи куонкуруһа мин үбүлүөйдээх сааспар ананан төрөөбүт дойдубар ыытыллыбытыттан олус астынным, үөрдүм. Онон СӨ Тыатын хаһаайыстыбатын уонна ас-үөл бэлиитикэтин министиэристибэтигэр (миниистир А. Александров) махтанабын. Мин көрөрбүнэн, кыттааччылар таһымнара үрдээбит. Эр дьон ыанньыксыттар кыттыбыттарыттан үөрдүм. Доҕотторум Михаил Николаевич Готовцев уонна Владимир Африканович Михайлов кэлэн ыалдьыттаатылар, кинилэр эмиэ астынан бардылар. Онон куонкурус кыттыылаахтара, көрө кэлбит дьон дьиҥнээх дьоруойдары бэйэлэрин чугастан көрөн, кэпсэтэн, үөрдүлэр. Владимир Африканович кэргэниниин түүннэри үҥкүүгэ кытта сылдьыбыта. Кыайыылаахтарга наһаа үчүгэй бириистэри туттардылар. Успуонсардаабыт уолаттар абыраатылар. Министиэристибэ, улуус салалтата, тыа хаһаайыстыбатын управлениета, Төхтүр нэһилиэгин дьаһалтата (баһылык Стручков В. Н.) олус бэркэ кыттыһан, тэрийдилэр. Ону тэҥэ Мэҥэ Хаҥалас улууһун нэһилиэктэрин тыа хаһаайыстыбатын исписэлиистэрэ бука бары кэлэн субуотунньуктаабыттара. Дьиҥнээх үлэ бырааһынньыга, ыанньыксыты чиэстээһин буолла.