Мохсоҕоллоох оскуолатыгар 450 миэстэлээх эбии дьиэтэ арыллара былааннанар

Кэлэр нэдиэлэҕэ Мохсоҕоллоох орто оскуолатыгар 450 миэстэлээх эбии дьиэтэ тутуллан арыллара былааннанар. Тутуу бастакы сыбаайата былырыын Саха Өрөспүүбүлүкэтин күнүгэр түһэриллибитэ.

«Тутуу бэдэрээччитэ — «Якутцемент» АУо. Оскуолаҕа оҕолор икки симиэнэн үөрэнэллэр. Саҥа тутуу үлэҕэ киириэҕиттэн оҕолор биир симиэнэ үөрэххэ көһүөхтэрэ. Эбийиэк 450 үөрэнээччигэ суоттанна. Бу күннэргэ тутуу үлэтэ  толору кээмэйинэн түмүктэннэ, кыра үлэлэр хааллылар», — диэн Хаҥалас улууһун дьаһалтатын тутуу инфраструктуратын управлениетын начаалынньыга Алексей Мартынов иһитиннэрдэ.

Бүгүҥҥү туругунан Мохсоҕоллоох орто оскуолатыгар 800- тэн тахса оҕо үөрэнэр. Оскуола үс этээстээх эбии дьиэтин иэнэ 3,7 тыһыынча кв.м., онно 16 кылаастаах уонна эбии дьарыктары ыытарга 8 хостоох, физкултуура уонна актовай саалалардаах. Бу туһунан Хаҥалас улууһун дьаһалтатын пресс-сулууспата иһитиннэрэр.