«Мой бизнес» киин байыаннай дьайыы буола турар сиригэр тырааныспардары ыытта

Кэлэр нэдиэлэҕэ байыаннай дьайыы бара турар сиригэр, хайдахтаах даҕаны куһаҕан суоллаах-иистээх сиргэ сылдьар сэттэ тиэхиньикэни ыытыахтара. Массыыналары бэҕэһээ Биир кэлим сүрүннүүр киин бэрэссэдээтэлэ, Арассыыйа Бэрэсидьиэнин Саха сириттэн бастайааннай бэрэстэбиитэлэ Андрей Федотов тутта.

Кини байыаннай дьайыы кыттыылаахтарын ааттарыттан «Мой бизнес» киин, Өрөспүүбүлүкэтээҕи уопсастыбаннай доруобуйа уонна мэдиссинэ профилактикатын киинин, Дьокуускайдааҕы мэдиссиинэ кэллиэһин, Дьокуускайдааҕы педагогическай кэллиэс, Өрөспүүбүлүкэтээҕи инфокуммуникационнай технология киинин, СӨ массыына суолларын управлениетын уонна Ветеринария управлениетын кэллэктииптэригэр тэрилтэлэр массыыналарын байыастарга ыыппыттарын иһин махталын биллэрдэ диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

«Байыаннай дьайыы бара турар сиригэр тырааныспар мэлдьи наада. Саха сириттэн фроҥҥа эрдэ бэриллибит уонунан массыына хайдахтаах улахан үлэни толоро сылдьалларын билэбит. Байыастар түргэнник-тарҕаннык тутталлара олус наадалаах. Кинилэр биһиги ыытар тырааныспарбытынан саа сэбин, снарядтары, бородууктаны, бааһырбыт байыастары, о.д.а. таһаллар. Биллэн турар, байыаннай усулуобуйаҕа массыынаны туһаныы олус уустук, тиэхиньикэ үгүстүк алдьанар. Ол иһин бу массыыналар олус наадалаахтар уонна туһалаахтар. Бүгүн Саха сирин олохтоохторо массыыналары фроҥҥа ыытан, байыастарга араас көмөнү оҥорон туран норуот уонна аармыйа биирдэрин көрдөрөллөр», – диэтэ Андрей Федотов.