«Молквест» күрэх — Күүлэт ыччатын түмтэ

Бу күннэргэ Бүлүү улууһун 1-кы Күүлэтигэр ыччаты түмэр, чөл олоҕу өрө тутар, нэһилиэк историятын үөрэтэр сыаллаах-соруктаах «Чөл олохтоох нэһилиэк» бырагыраама чэрчитинэн «Молквест» хамаанданан күрэхтэһии буолан ааста.

Уопсайа 6 саамай быһый, сытыы-хотуу, хорсун, эрчимнээх хамаандаҕа түөрт киһилээх, ол иһигэр икки эр бэрдэ, икки кэрэ аҥар күөн көрүстэ. Күрэх балаһыанньатынан күрэхтэһээччилэр аҕыс ыстаансыйанан сүүрэ сылдьан сорудахтары толордулар.

Хас биирдии хамаандаҕа ыстаансыйаларынан маркированнай маршрутнай карта бэриллибитэ: «Гусеница», «Пулевая стрельба», «Веселая скамейка», «Найди сокровище», «Лабиринт», «Первая медицинская помощь», «Разжигание костра», «Перетягивание каната» моһоллорун туораатылар, күүстэрин холонон көрдүлэр.

Түмүгү ыстаансыйаларга хамаанда сорудаҕы төһө бириэмэҕэ толорбута быһаарда. Күрэхтэһии кыайыылахтара грамоталарынан, кубогынан, сертификаттарынан наҕараадаланнылар.

Бочуоттаах 3-c миэстэни «Отчуттар» хамаандалара ылла. Арылхан Тутукаров, Марина Евсеева, Радомир Григорьев, Анжела Тутукарова хамаандалара 20 000 суумалаах сертификатынан наҕараадаланна.

2-c миэстэҕэ «Бөрөлөр» хамаанда таҕыста. Петр Никифоров, Роман Окоемов, Аиша Иванова, Сайаана Тутукарова хамаандалара 32 000 суумалаах сертификат хаһаайынынан буолла.

Тыҥааһыннаах киирсии түмүгүнэн 1-кы миэстэҕэ эдэр ыаллар «Дружба» хамаандалара таҕыста. Матрена уонна Егор Федоровтар, Анна уонна Ариян Слепцовтар 40 000 суумалаах сертификаты тутан үөрүүлэрэ үксээтэ.

«Олус үчүгэй тэрээһин буолан ааста, ыччат көхтөөхтүк кытынна. Бу күрэҕи тэрийсибит ыччаттарга, чуолаан, тэрийээччилэргэ Петр Филипповка, Дария Захароваҕа, Наталья Федотоваҕа, Прокопий Николаевка, Прокопий Федотовка, Лариса Самсоноваҕа, Анатолий Лыткиҥҥа барҕа махталбытын тиэрдэбит. Биир сомоҕо буоланнар, уопсай күүһүнэн-көмөнөн үрдүк таһымнаахтык күрэхтэһиибит түмүктэннэ», — диэн Бүлүү улууһун 1-кы Күүлэтин успуорка исписэлииһэ Ф.А. Левин кэпсээтэ.