Эйэ ыһыаҕа Монголияҕа үрдүк таһымнаахтык буолан ааста

Бэс ыйын 7-8 күннэригэр Монголияҕа ыытыллыбыт Эйэ ыһыаҕар 300-тэн тахса киһи кытынна.

Бу туһунан бүгүн пресс-кэмпириэнсийэ кыттааччылара кэпсээтилэр, санааларын атастастылар. Суолталаах тэрээһин Улан Батор аттынааҕы Горхи-Терелж пааркаҕа буолла. Араас дойдуларга сыллата ыытыллар бырааһынньык быйыл Арассыыйа уонна Монголия доҕордуу сыһыаннарын тоһоҕолоон бэлиэтээтэ.

«Ханна да олорбуппут иһин, сахалар тылбытын уонна үгэспитин умнубаппыт,  дойдубутугар бэриниилээхпит көстөр. Биир дойдулаахтарбыт тас дойдуларга маннык тэрээһиннэри тэрийиигэ үөрэ-көтө кытталлар, көхтөөхтүк ылсан көмөлөһөллөр уонна өйүүллэр.  Ол да иһин Эйэ ыһыаҕа өрүү истиҥник уонна үрдүк таһымнаахтык ыытыллар. Ыһыах ыалдьыттара оҕуруонан тигии оҥоһуутугар, сылгы сиэлинэн оҥоһук уонна хомуска оонньооһун маастар-кылаастарыгар кытыннылар», — диэн ыһыаҕы тэрийээччи Лариса Кулаковская бэлиэтээн эттэ. “Симэх” кииниттэн «Күн дьөһөгөй» быыстапканы туруорбуттарын, онно  үгэс буолбут технологияны туһанан оҥоһуллар бородууксуйалары билиһиннэрбиттэрин туһунан  култуура диэйэтэлэ Яна Игнатьева кэпсээтэ.  Ыһыах сэргэтин туруорбут “Киэргэ” фирма дириэктэрэ Александр Павлов үлэтин туһунан сиһилии билиһиннэрдэ. Тэрээһин кэмигэр Монголияттан куйаар ситиминэн Эйэ ыһыаҕын ыытыыга кыттыбыт салайааччылар тахсан санааларын үллэһиннилэр.

Эйэ ыһыаҕын тас дойдуларга саха литературатын төрүттээччи Алексей Кулаковскай-Өксөкүлээх Өлөксөй сиэнэ Лариса Кулаковская тэрийэн ыытар. Монголия өттүттэн киниэхэ саха-монгол доҕордоһуутун уопсастыбатын салайааччыта Амаржаргал Бальжинням, Монголияҕа саха диаспоратын 28 сыл устата салайан үлэлэтэр Ньурба улууһуттан төрүттээх  Розалия Антонова уонна  саха диаспора  актыбыыһа Анна Уран көмөлөстүлэр.

“Монголияҕа ыытыллыбыт Эйэ ыһыаҕа онно кыттыбыт дьоҥо бэрт үтүө өйдөбүлү хаалларда”, — диэн бэлиэтээтэ  СӨ тас дойдуларга уонна Саха сирин норуоттарын дьыалаларыгар миниистири бастакы солбуйааччы Сергей Хатылыков.