Монголияҕа норуоттар икки ардыларынааҕы ыһыах ыстылар

Бэс ыйын 7 күнүгэр Монголияҕа Горхи-Тэрэлж национальнай пааркатыгар норуоттар икки ардыларынааҕы «Ысыах Мира – 2025» — тас дойдуларга олорор сахалары түмэр улахан ыһыах буолан ааста.

Бырааһынньык СӨ төрүт норуоттарын култуураларын тарҕатыыга, гуманитарнай сибээһи бөҕөргөтүүгэ, норуоттар икки ардыларынааҕы култуурунай бииргэ үлэлээһиннэри сайыннарыыга уонна төрүт норуоттар култуураларын популяризациялааһыҥҥа ананна.

«Ыһыах Мира» диэн ыһыах бырааһынньыгы сыл ахсын аан дойду араас дойдуларыгар ыыталлар. Тэрийээччилэринэн Саха литературатын төрүттээччи Алексей Кулаковскай сиэнэ Лариса Кулаковская, куратор, Монголо-Саха сибээстэрин уопсастыбатын бэрэссэдээтэлэ Амаржаргал Балжинням, Анна Уран уонна Монголияҕа Саха диаспората буолаллар.

Тэрээһин бырагыраамата култуурунай, үөрэх уонна этнографическай тэрээһиннэринэн баай — маастар-кылаастар, национальнай көстүүм симэҕин көрдөрүүтэ, мас-рестлинг күрэхтэһиитэ, саха уонна монгол артыыстарын кэнсиэртэрэ, саха төрүт аһын билиһиннэрии, быыстапкалар, о.д.а. буолан аастылар. Бу туһунан Тас сибээскэ уонна духуобунай сайдыыга министиэристибэтин пресс-сулууспата иһитиннэрэр.

Бырааһынньыкка СӨ норуодунай «Симэх» прикладной уонна уус-уран ускуустубатын национальнай киинэ кыттыыны ылла. Киин үлэһиттэрэ «Күн дьөһөгөй» диэн ураты этнографическай быыстапканы туруордулар. Тэрээһин бочуоттаах ыалдьытынан Монголия федерациятын Ыксаллаах уонна Боломуочуйалаах Посола Алексей Евсиков буолла. Монголияҕа ыһыах ыһыллыыта саха култуурата көлүөнэни да, норуоттары да түмэрин бигэргэттэ. Бырааһынньык СӨ Тас сибээскэ уонна духуобунай сайдыыга министиэристибэтин өйөбүлүнэн тэрилиннэ.