Моорук Суолата отчуокка түмүстэ

Бүгүн Мэҥэ Хаҥалас улууһугар ситэриилээх былаас ааспыт сыллааҕы үлэтин отчуоттуур. Бөлөҕү экэниэмикэ миниистирэ Петр Попов салайар.

Иккис бөлөх Өлөчөйтөн Моорук Суолатыгар кэллэ. Бүгүҥҥү тэрээһин кэмигэр өрөспүүбүлүкэ тыа хаһаайыстыбатын министиэристибэтиттэн Анастасия Михайлова, үөрэх министиэристибэтиттэн Марианна Романова наҕараадаланнылар.
Суолалар ааспыт сыллааҕы үлэ отчуотугар олоҕуран эмиэ атын нэһилиэктэр курдук интэриэһиргиир ыйытыыларын биэрдилэр.
Алмааһы хостооһун тиэмэтигэр «үһү» диэн дойҕохторго олоҕурбаттарын туһугар олохтоохторго бу боппуруоска өрөспүүбүлүкэ бырамыысыланнаска, геологияҕа миниистирин бастакы солбуйааччы М.А.Кириллин сиһилии быһаарда. Уонна 2030 сылга диэри Чыамайыкыга  геологическай-чинчийэр, научнай-чинчийэр үлэлэр ыытыллыахтара диэн чопчулаата.
Биэнсийэлээх Роберт Егоров олохтоох ФАП үчүгэйдик үлэлиирин, ол эрээри кырдьаҕастар сытар балыыһаҕа наадыйалларын эттэ. Мэдиссиинэ үлэтин тэрийии боппуруоһугар тустаах министиэристибэ отделын салайааччыта Сардаана Тарабукина быһааран биэрдэ. Успуорт саалатын тутууну ситэриигэ бырайыагын, эспэртиисэтин чөкөтөр туһунан улуус баһылыгын тутууга солбуйааччы В.Филиппов быһаарда.
Скважинаны оҥоруу боппуруоһугар Бырамыысыланнас министиэристибэтигэр сайаапка түһэрэллэригэр этилиннэ.
Түмүккэ суолалар ааспыт ситэриилээх былаас ааспыт сыллааҕы үлэтин  биһирээтилэр.