Москва метротугар «Уһук Илин экспреһэ»  ахсыс төгүлүн үлэҕэ таҕыста

Москваҕа Арбатскай-Покровскай лииньийэҕэ «Уһук Илин экспреһэ» диэн  пуойас сүүрэн саҕалаата. Бу пуойас Норуот сомоҕолоһуутун күнүгэр ананан, ахсыс төгүлүн үлэҕэ киирдэ. Бырайыак «Уһук Илин күннэрэ — Москваҕа» бырагыраама чэрчитинэн ыытыллар уонна пассажирдары Уһук Илин федеральнай уокурук 11 эрэгийиэнин айылҕатын, култууратын уонна экэниэмикэтин билиһиннэрэр соруктаах.

«„Уһук Илин экспреһэ“ Москва метротун пассажирдарын Уһук Илин 11 эрэгийиэнин айаҥҥа ыҥырар. Биһиги Москва олохтоохторугар уонна ыалдьыттарыгар кэрэ-бэлиэ уһук илин сирин, кини тугунан киэн туттарын уонна аатырарын туһунан кэпсиэхпитин баҕарабыт. Кэрэ айылҕатын уонна уһук илиҥҥэ олорор күүстээх санаалаах дьонун туһунан. Онно ханнык киэҥ далааһыннаах бырайыактар үлэлэрин саҕалыылларын уонна бөдөҥ тэрилтэлэр аһыллан эрэллэрин туһунан. Уһук илин куораттарын тас көстүүлэрэ хайдах уларыйарын, Уһук Илиҥҥэ үөрэнэ, үлэлии уонна олоро тоҕо кэлиэххэ сөбүн уонна наадатын туһунан. Дойдубут бары олохтоохторун Уһук Илини бэйэҕитигэр арыйаргытыгар ыҥырабыт», – диэн РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев эттэ.

Уһук Илини уонна Арктиканы сайыннарыы корпорациятын генеральнай дириэктэрэ Николай Запрягаев «Уһук Илин экспреһэ» көмөтүнэн Уһук Илин киин куорат олохтоохторугар уонна ыалдьыттарыгар чугаһыырын эбэн эттэ. Хас биирдии вагоҥҥа судаарыстыба өйөбүлүнэн Уһук Илин эрэгийиэннэригэр олоххо киирбит бэйэни сайыннарыыга баар бары кыахтар көрдөрүлүннүлэр.

Санатан эттэххэ, Москваҕа «Арассыыйа» киинигэр сэтинньи 1 күнүттэн 30-гар диэри Уһук Илин күннэрэ ыытыллыахтара. Анал быыстапка экспозицията эрэгийиэн кыахтарын билиһиннэриэҕэ. Тэрээһиннэр сүрүн тиэмэлэринэн үөрэх, бэйэни сайыннарыы кыахтара, социальнай-экэнэмиичэскэй сайдыы уонна Уһук Илин эрэгийиэнигэр туризм буолуохтара.