Москва түһүлгэтигэр Саха сирин бастыҥ аһа-үөлэ

Москва Саҥа Арбаатыгар Уһук Илин дьаарбаҥката, өрүү да буоларын курдук, олус сэргэхтик, өрө көтөҕүллүүлээхтик ыытыллар.

Сэтинньи 4-11 күннэригэр Москва олохтоохторо уонна ыалдьыттара ас амтаннааҕын, бастыҥын амсайалларын сэргэ, өссө Уһук Илин туһунан билиилэрин-көрүүлэрин хаҥаталлар. Манна балык минньигэһэ, крабтар, таба этэ, искэх уо.д.а. күн талбыта, ас дэлэгэйэ тардыллыбыт. Өссө бэртээхэй сувенирдары, интэриэһинэй кинигэлэри, Уһук Илин уран тарбахтаах маастардарын ураты кэрэ оҥоһуктарын көрүөххэ сөп. Дьаарбаҥкаҕа урутаан сайдыы сиригэр-уотугар (ТОР), логистикаҕа, балыгы астааһыҥҥа, тыа хаһаайыстыбатыгар, порт үлэтигэр, туризмҥа уонна сынньалаҥ эйгэлэригэр сыһыаннаах бырайыактары сырдатар, билиһиннэрэр хаартысканан быыстапкалар болҕомтону тардаллар. Биллэн турар, манна киэҥ хабааннаах култуура бырагыраамата бииртэн-биир дьону-сэргэни ыҥырар-угуйар. «Ситим» ансаамбылы, хомусчут Артур Семеновы, уо.д.а. сэргии истэллэр, көрөллөр.

Дьаарбаҥка бастакы күнүгэр Саха сирин минньигэс балыгын амсайаары халыҥ уочараттан дьон саллыбатах. Маныаха хотугу дойду ураты амтаннаах, иҥэмтиэлээх минньигэс аһын-үөлүн амсайыан баҕалаах сыллата элбиирэ бэлиэтэнэр. Түһүлгэҕэ аһы-үөлү таһынан, уран уустары, норуот маастардарын куруутун кэрэхсииллэр, сэргииллэр. Маныаха дьаарбаҥкаҕа кинилэр маастар-кылаастара ыытылларын истэн, онно сылдьыан, үөрэниэн, холонон көрүөн баҕалаах элбээн иһэрэ бэлиэтэнэр.

Санатан эттэххэ, Москваҕа бу балаҕан ыйын 25  күнүттэн саҕаламмыт «Уһук Илин күннэрэ» үгэс курдук ыытыллар бырагыраама сорҕотунан буолар. Бырагыраама үс ыйга суоттаммыт. Бу кэм устатыгар Москваҕа үөрэх, култуура эйгэтигэр сыһыаннаах тэрээһиннэр, дьыалабыай көрсүһүүлэр ыытыллаллар. Сыала — Уһук Илин баар үчүгэйи, бастыҥы көрдөрүүнэн эрэ муҥурдаммакка, бу үлэҕэ, үөрэххэ, сынньалаҥҥа сыһыаннааҕы киэҥник көрдөрүү, билиһиннэрии. Сэтинньи 20  күнүттэн ахсынньы аҕыһыгар диэри «Уһук Илиннээҕи улахан квест» былааннанар. Манна ким баҕалаах кыттыан сөп. Кыайыылаахтарга Уһук Илин эрэгийиэнигэр сынньаналларыгар путевкалар туттарыллыахтара. «Москваҕа Уһук Илин эрэгийиэннэрин күннэрэ- 2023» тэрээһин уопсастыбаннай-дьыалабыай наҕараадалары туттарыынан түмүктэниэ. Ол курдук, «Звезда Дальнего Востока» ахсынньы сэттиһигэр уонна В.К.Арсеньев аатынан Бүтүн Арассыыйатааҕы литературнай бириэмийэ ахсынньы аҕыс күнүгэр былааннаналлар.

Хаартыскалар СӨ Ил Дарханын уонна бырабыыталыстыбатын пресс-сулууспатын тиксэриилэрэ