Москваҕа Арсеньев аатынан «Уһук Илин» литературнай бириэмийэ кыайыылаахтара ааттаннылар

В.К. Арсеньев аатынан «Уһук Илин» Бүтүн Арассыыйатааҕы литературнай бириэмийэ кыайыылаахтарын биллэрэр уонна наҕараадалыыр үөрүүлээх сиэр-туом Москваҕа бээтинсэҕэ, ахсынньы 5 күнүгэр, буолан ааста.

Сиэр-туом үгэс быһыытынан  Арассыыйа култууратын пуондатын дьиэтигэр ыытылынна. Бу туһунан www.sakha.gov.ru сайт иһитиннэрэр.

Суруйааччыларга наҕараадалары АР Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлин солбуйааччы Григорий Куранов, Уһук Илин сайдыытын миниистирин солбуйааччы Антон Басанский уонна бириэмийэ дүүллүүр сүбэтин бэрэссэдээтэлэ, суруйааччы Юрий Поляков туттардылар.

• «Уһун проза» номинацияҕа «Заветный берег» айымньы ааптара Ольга Рожнева (Козельск, Калужскай уобалас) кыайыылааҕынан таҕыста.
• «Кылгас проза» номинацияҕа Улита Котельникова (Магадан, Магадан уобалаһа) кыайда. Кини «Тундра помнит» айымньыны суруйбут.
• «Оҕолорго аналлаах проза» номинацияҕа бириэмийэни «Тигренок, на которого не хватило краски» (6+) кинигэ ылла. Айымньы ааптара Екатерина Згурская (Москва).
• «Уһук Илини сайыннарыыга кылаатын иһин» анал номинация быйыл «Русский мир» пуонда Уһук Илиннээҕи филиалын дириэктэригэр, Нуучча тылын уонна литературатын преподавателлэрин Азия-Чуумпу акыйаан Ассоциациятын бэрэсидьиэнигэр Александр Зубрицкайга (Владивосток, Приморскай кыраай) туттарылынна.

Ахсынньы 5 күнүнээҕи үөрүүлээх тэрээһиҥҥэ федеральнай былаас уорганнарын уонна Уһук Илин эрэгийиэннэрин былаастарын уорганнарын бэрэстэбиитэллэрэ, Арассыыйа култууратын диэйэтэллэрэ, литератордар, таһаарааччылар уонна критиктэр, федеральнай уонна эрэгийиэннээҕи иһитиннэрэр-биллэрэр эйгэ үлэһиттэрэ кытыннылар.

Быйыл бириэмийэ тэрийэр кэмитиэтигэр барыта 80 сайаапка киирбит. Ааптардар РФ 15 эрэгийиэниттэн, Кытай Норуодунай Өрөспүүбүлүкэтиттэн, Кэриэйэ Өрөспүүбүлүкэтиттэн, Казахстан Өрөспүүбүлүкэтиттэн кыттыбыттар. Арсеньев аатынан литературнай күрэххэ официальнай саайтыгар тахсыбыт балаһыанньа быһыытынан, Уһук Илин билиҥҥитигэр эбэтэр кэскилигэр анаммыт нууччалыы тылынан суруллубут уус-уран уонна документальнай проза айымньылардаах Арассыыйа уонна тас дойдулар ааптардара кытталлар.

Арсеньев аатынан бириэмийэ сэттис сезонун уһун испииһэгин балаҕан ыйыгар X Илиҥҥи экэнэмиичэскэй пуорум кэмигэр АР Бэрэсидьиэнин Уһук Илин федеральнай уокурукка боломуочуйалаах бэрэстэбиитэлин солбуйааччы, Арсеньев аатынан бириэмийэ тэрийэр кэмитиэтин бэрэссэдээтэлэ Григорий Куранов билиһиннэрбитэ. Бириэмийэ РФ Бырабыыталыстыбатын Бэрэссэдээтэлин солбуйааччы – АР Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев көҕүлээһининэн тэриллибитэ. Аан бастаан бириэмийэ лауреаттара 2019 сыл ахсынньытыгар ааттаммыттара. «Москваҕа Уһук Илин эрэгийиэннэрин күннэрэ» иитэр-патриотическай тэрээһиннэр чэрчитинэн Арассыыйа култууратын пуондатын дьиэтигэр буолбута.