Москваҕа «Багровое солнце» саха этно-мюзикл дебюта биһирэннэ

Бэс ыйын 11 күнүгэр Москваҕа аатырбыт «У Никитских ворот» тыйаатырга «Багровое солнце» саха этно-мюзикл премьерата буолла.

Премьера иннинэ бары билиэттэр атыыламмыттар, тыйаатыр саалата толору көрөөччүлээх көрүстэ. Бөлөх кыттааччылара фольклору өрө көтөҕүллүүлээх билиһиннэрдилэр. Испэктээк биир тыынынан ааста диэн Саха эстрадатын тыйаатырын пресс-сулууспата иһитиннэрэр.

«Уһулуччулаах үлэ! Олус интэриэһинэй — режиссерскайтан тиэхиньиичэскэйигэр тиийэ». Браво! Саха номохторугар, чаҕылхай театральнай уонна аныгы муусукаларга олоҕурбуккут». Сценография уонна уота Россия европейскай чааһыгар экзотиканы киллэрдэ» уо.д.а. диэн көрөөччүлэр санааларын үллэһиннилэр.

«Испэктээккэ тыйаатыр уус-уран салайааччыта, биллиилээх режиссер, драматург, Арассыыйа норуодунай артыыһа Марк Розовскай сырытта. Марк Григорьевич биһигини кытта истиҥ доҕордуу сыһыаны өйүүр. Бу сырыыга кини артыыстары тус бэйэтинэн эҕэрдэлээтэ уонна иһирэх тылларын анаата. Биһиги «Багровое солнце» испэктээппит өссө биир престижнэй сыанаҕа ситиһиилээхтик көрүүгэ таҕыста. Тыйаатырга көрөөччүлэрбитигэр уонна биир дойдулаахтарбытыгар барҕа махтал», — диэн Саха эстрадатын тыйаатырын пресс-сулууспата суруйар.