Москваҕа ботулизмынан маассабай сүһүрүү буолла
Москваҕа ботулизмынан маассабай сүһүрүү түбэлтэтэ таҕыста. Биир дьиэ кэргэнтэн биэс киһи ыарахан туруктаах балыыһаҕа, реанимацияҕа киирбит.
Кинилэр чааһынай киһиттэн кэнсиэрбэлэммит, тууһаммыт оҕуруот аһын ылан сиэбиттэр. «Биэс улахан киһи бары ыараханнык сүһүрбүттэр, хотуолууллар, тыыналларыгар ыарахан буолбут», — диэн Mash телеграм-ханаал суруйар.
Бу дьиэ кэргэнтэн 3 саастаах оҕо эрэ сүһүрбэтэх. Бу кыра оҕоҕо сүһүрбүт бородууктаны сиэппэтэхтэр.
Биэс киһи бары ыарахан туруктаах, ИВЛ аппараатыгар холбонон сыталлар. Бу дьиэ кэргэнтэн ураты, сүһүрбүт дьон ахсаана өссө эбиллиэн сөп диэн этэллэр.
Ботулизм — бу инфекционнай ыарыы, ботулизм клостридията диэн бактыарыйа оҥорор дьаатыттан сүһүрүү буолар. Кэнсиэрбэни үчүгэйдик оҥорботоххо, эбэтэр, уксууһунан, тууһунан көөнньөрбөтөххө, үөскүөн сөп. Маны тэҥэ, ыыһаммыт балыкка, халбаһыга, ветчинаҕа баар буолуон сөп.
Ботулотоксин дьаатыттан киһи тыынар уоргана, былчыҥа үлэлээбэт буолан, баралыыстатан, өлүөн сөп. Ботулотоксин 0,3 микрограммын сиэбит киһи өлөр. Балыыһаҕа эрдэ киирэн, үчүгэйдик эмтэммит дьон үксэ тыыннаах ордор, ол эрээри, доруобуйатыгар улахан охсууну ылар.
Вotulus диэн латыынныы тылтан «халбаһы» диэн буолар. Былыр дьиэтээҕи халбаһы сиэн баран, ыалдьаллар эбит, онон оннук ааттаммыт.
Сообщить об опечатке
Текст, который будет отправлен нашим редакторам: