Москваҕа гирляндаттан сылтаан баһаарга икки оҕо суорума суолланна

Москва Библиотечнай уулуссатыгар турар уон этээстээх дьиэтигэр баһаар буолла, икки оҕо өллө. Бу туһунан Москва куорат борокуратууратын пресс-сулууспата иһитиннэрэр диэн «Московский комсомолец» саайт суруйар.

Биэдэмистибэ дааннайынан, 2014 уонна 2019 сыллаах оҕолор балыыһаҕа «суһал көмө» массыынатынан айаннаан иһэн олохторо быстыбыт. Кинилэр 1975 сыллаах төрүөх аҕаларын реанимацияҕа киллэрбиттэр.

Mash телеграм-ханаал дааннайынан, бу ыал кыбартыыратыгар саҥа дьыллааҕы гирляндаттан баһаар барбыт. Уот штораҕа ыстаммыт.

Борокуратуура иһитиннэрэринэн, холуобунай дьыала тэриллибит, силиэстийэ үлэлиир. Баһаар чопчу туохтан барбытын быһаараллар.