Москваҕа хаар халыҥынан рекорд олохтонно
Ааспыт өрөбүлгэ, ахсынньы 3 күнүгэр, Москваҕа халыҥ хаар түһэн үллүктээбитэ. Гидрометцентр салайааччыта Роман Вильфанд эппитинэн, 145 сыллаах кэтээн көрүү устата маннык халыҥ хаар өссө түһэ илик эбит.
— Бүгүн Москваҕа сөҥүү түһүүтүнэн саҥа рекорд олохтонно. 145 сыллаах метеорологическай кэтээн көрүү устата аан бастаан 12 чаас иһигэр 10,7 миллиметрдаах сөҥүү түстэ, — диэн кини ТАСС ааҕыныстыбатыгар иһитиннэрдэ.
Урукку рекорд 1980 сыллаахха олохтоммут эбит — онно 9,4 миллиметрдаах сөҥүү түспүт.
Москваҕа халыҥ хаар түспүтүттэн сылтаан, суолга элбэх саахал таҕыста. Холобур, Подмосковьеҕа аҥаардас Новорижскай шоссеҕа сүүрбэччэ массыына суол саахалыгар түбэспит. Хомунаалынай хаһаайыстыбатыгар хаары ыраастаан, үлэ бөҕөтүн көрүстүлэр.
Мантан ыла москвичтары өссө дьиҥнээх кыһыҥҥы тымныы күүтэр. Синоптиктар сабаҕалааһыннарынан, ахсынньы 8 күнүгэр -22 кыраадыс тымныйыахтаах. Бу сыллааҕы нуорматтан 10-15 кыраадыс намыһах, ол эрээри, рекорд буолбатах.
Маны тэҥэ, Европа дойдуларыгар эмиэ элбэх хаар, тымныы түһэн, үгүс дьону ыксатта.
Сообщить об опечатке
Текст, который будет отправлен нашим редакторам: