Москваҕа Ил Дархан Арассыыйа Дьоруойа Игорь Юргинныын көрүстэ

Саха сирин Ил Дархана Москваҕа “Дьоруойдар кэмнэрэ” Бэрэсидьиэн Бырагырааматынан үөрэнэ сылдьар Арассыыйа Дьоруойа Игорь Юргинныын көрүстэ, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.

“Туох сонуннаахпытын кэпсэттибит. Игорь бастыҥтан бастыҥнар түбэһэр “Дьоруойдар кэмнэрэ” бырагырааманан хайдах үөрэнэ сылдьарын кэпсээтэ. Бу бырагыраамаҕа киирэн, кини бастыҥ спикердэргэ уонна преподавателлэргэ үөрэнэриттэн астынарын эттэ. Үөрэҕин кэмигэр кыттааччыларга настаабынньыктары сыһыараллар – мин Игорьга настаабынньык буолбуппуттан үөрэбин уонна киэн туттабын”, — диэн санаатын үллэһиннэ Айсен Николаев.

Итиэннэ көрсүһүү кэмигэр байыаннай сулууспалаахтары салгыы хайдах өйүүрбүтүн, сулууспаларын кэнниттэн реабилитацияны баралларын дьүүллэстибит, диэн эбэн эттэ.

Бу күннэргэ Бэрэсидьиэн академиятын судаарыстыбаннай управлениеҕа Үрдүкү оскуолатыгар үөрэнэ сылдьар “Дьоруойдар кэмнэрэ” Бырагыраама истээччилэрин үөрэтии бастакы блога түмүктэннэ.  Кыттааччылар судаарыстыбаннай сулууспа үлэтин билистилэр, инникитин ханнык хайысханан үлэлиэхтэрин сөбүн торумнаатылар.

РФ Бэрэсидьиэнэ олохтообут “Дьоруойдар кэмнэрэ” Бырагыраама бастакы модула бөдөҥ госкорпорациялар уонна федеральнай биэдэмистибэлэр базаларыгар стажировкаланыы көрүҥүнэн салҕаныа. Кыттааччылары настаабынньыктар хонтуруоллаан үлэлэтиэхтэрэ, тус бэйэлэрин уопуттарын атастаһыахтара, госсулууспанан тахсан иһэллэригэр көмөлөһүөхтэрэ, ыйан-кэрдэн биэриэхтэрэ.

Куонкурус настаабынньыктарынан Бэрэсидьиэн Дьаһалтатын үлэһиттэрэ, уокуруктар боломуочуйалаах бэрэстэбиитэллэрэ, РФ Бырабыыталыстыбатын чилиэннэрэ, Федерация Сэбиэтин сенатордара, Госдума дьокутааттара, эрэгийиэн баһылыктара, судаарыстыбаннай корпорациялар генеральнай дириэктэрдэрэ буолаллар диэн эттилэр Бэрэсидьиэн академиятын судаарыстыбаннай управлениеҕа Үрдүкү оскуолатыгар.