Москваҕа киинэ тыйаатырыгар бачча элбэх көрөөччү кэлбитин саҥа көрдүм

Муус устар 26 күнүгэр Москва куоракка Метрополис «Синема парк» атыы киинин киинэ тыйаатырыгар биир дойдулаахпыт Сандал Баишев “Диодорова. Против течения» киинэтин көрдүм.

Анал көрдөрүү буолла. Онон сүрүн дьоруойдар Настя ийэтинээн Людмилалыын бааллар. Биһиги өрөбүл аайы Москва киинэ тыйаатырдарыгар араас киинэлэргэ сылдьабыт эрээри, бачча элбэх көрөөччү кэлбитин саҥа көрдүм.

Режиссер Сандал Баишев бу аҕыйах балтараа чаас иһигэр бүтүн биир киһи уустук дьылҕатын олус итэҕэтиилээхтик, судургутук, ылыннарыылаахтык арыйбыт. Оннооҕор эр дьон,  хаһан да харахпыт уутунан суунааччыта суох дьон, бүгүн бу киинэҕэ ытаатыбыт дэһэллэр. Чахчы да оннук. Харах уута суох көрбөт киинэҥ эбит. Киинэ киһи аймахха элбэҕи толкуйдатар, үөрэтэр аналлаах. Дьон санаатын, олоҕун тосту уларытар күүстээх дии санаатым. Уобарастар бары даҕаны олус сөпкө талыллыбыттар. Көрсүһүү киинэ кэнниттэн буолла. Харбааһынынан дьарыктанар кырачаан кыргыттар араас сүбэлэтэр ыйытыктары биэрдилэр. Тыл эппит дьон бары режиссерга, кини хамаандатыгар махтаннылар. Настя ийэтэ —  Людмила уобараһа барыбытыгар холобур буолар. Олус күүстээх санаалаах, оҕотун иннигэр туохтан да толлубат, муударай, киэҥ көҕүстээх, холку майгылаах саха дьахтара. Өссө төгүл бу уобарас дьиҥнээх ийэ анабылын хайдах буолуохтааҕын көрдөрөн, оҕотугар киэҥ, сырдык суолу тэлэригэр төһүү күүс буолла. Хайдахтаах да ыарахан балаһыанньаттан киһи диэн өйүн-санаатын, дьаныарын күүһүнэн тахсар суолу тобулар күүстээҕин көрдөрдө.

Онон, олус үрдүк таһымнаах киинэ тахсыбытынан бука барыгытын эҕэрдэлиибин! Эдэр кэскиллээх ыччаппытыттан Сандалтан өссө да үгүс үтүө айымньылары күүтэбин!

Светлана ГОГОЛЕВА. Москва