Хаартысканы Үгүлээт оскуолата тиксэрдэ
И.В.Яковлев аатынан Бүлүү улууһун Үгүлээт орто оскуолатын сэттэ туйгун үөрэнээччитэ уонна байыаннай дьайыыга сылдьар байыастар оҕолоро сааскы сынньалаҥнарыгар Москва куоракка баран кэлбиттэр.
Айаны нэһилиэк баһылыга Октябрь Иванович Лукин көҕүлээбит. Оҕолору икки учуутал арыаллаабыт. Учууталлартан биирдэстэрэ, Үгүлээт оскуолатын дириэктэрин иитэр үлэҕэ солбуйааччы Татьяна Петровна Маисовалыын кэпсэттим.
— Бара-кэлэ айаммыт төлөбүрүн нэһилиэкпит дьаһалтата уйунна. Ону сэргэ улууспут дьаһалтата хонук сирбитин төлүүргэ үбүнэн-харчынан көмөлөстө. Үгүлээт нэһилиэгэ Өлөөн улууһун кытта кыраныыссалаһан сытар, онон Дьокуускайга диэри ыраах айаннаахпыт, ону улууспут култууратын, үөрэҕириитин управлениеларын массыыналара босхо илдьэн-аҕалан абыраатылар. Түгэнинэн туһанан, бу кыһаммыт-мүһэммит дьоммутугар, чуолаан нэһилиэкпит аҕа баһылыга Октябрь Ивановичка махталбытын биллэрэбит.
Айаммыт сүрүн сыала – идэҕэ туһаайыы. Бүлүү улууһа Москваҕа «Роскосмос» тэрилтэни кытта ыкса ситимнээхтик үлэлиир. Москваҕа тиийбиппитигэр, роскосмостар көрсөн, Москва кытыытыгар баар “Звезднай” диэн дьоҕус куораты көрдөрдүлэр. Манна тиэхиньиичэскэй, дьон олорор комплекстарын көрдүбүт. Ол курдук, аракыата макыаттарын, космонавтар эрчиллэр аныгы аппарааттарын тутан-хабан, олорон көрөн олус астыннылар. Ону сэргэ, Юрий Гагарин аатынан Космонавтика мусуойугар сырыттыбыт. Онно Юрий Гагарин, Валентина Терешкова кэппит пуормаларын көрөн, оҕолор олус сөхтүлэр-махтайдылар. Биһигини кытта Арассыыйа Дьоруойа, биллэр космонавт Олег Германович Артемьев кэлэн көрүстэ. Илии тутуһан эҕэрдэлэһэн, барыларыгар илии баттааһыннаах хаартыскатын бэлэхтээтэ. Юрий Гагарин өйдөбүнньүгэр тыыннаах сибэкки дьөрбөтүн уурбуппут. Устуоруйаттан быһа тардан кэпсээтэххэ, Юрий Гагарин кэргэнигэр куруук сибэккилээх кэлэр эбит. Ол иһин өйдөбүнньүгэр илиитин кэннигэр сибэкки дьөрбөтүн тутан турар гына оҥорбуттар. Хас космонавт көтүөн иннинэ уонна көтөн кэлэн баран манна сибэкки уурар үгэстээхтэр эбит.
Ньургун Маисов, 5 кылаас туйгун үөрэнээччитэ:
– Бу Москваҕа баран кэлбит сырыыбыттан “Звезднай” куораты олус сөбүлээтим. Космонавт дьиҥнээх таҥаһын тутан-хабан көрбүппүн астынным. Биһиги нэһилиэкпититтэн чугас аракыата тобоҕо түһээччи. Аракыата ханнык чааһа буоларын дьэ, биллим. Ордук космонавтар аһыыр астарын дьиктиргээтим, анал собуокка оҥороллор эбит. Аһылыктара барыта кыра-кыра дьоҕус хааҕа сылдьар. Үлэһиттэр кэпсииллэринэн, космонавтар иэдьэгэйи саамай сөбүлээн сииллэр эбит. Куосумаска киһи амтаны билэрэ уларыйар диэтилэр. Дьиктитэ, куосумаска буоста (почта) таһаллар эбит.
Валера Иванов, 7-c кылаас үөрэнээччитэ:
– Москваҕа бастакыбын сырыттым. Сааскы сынньалаҥым хаһан да умнуллубаттык ааста. “Звезднай” куоракка космонавтар эрчиллэр сирдэрин сэргээтим. Кыһыл болуоссакка, «Остров мечты», НХСБ, о.д.а. сирдэринэн сылдьан астынныбыт.
Валерия Степанова, 5-с кылаас үөрэнээччитэ:
– Москваҕа сылдьан дьиҥнээх космонавы Олег Артемьевы кытта көрсүһүүнү, түмэллэргэ сылдьыбыппытын астынным. Ону таһынан, Москва вышкатыгар тахсан, киин куораты үөһээттэн көрөр наһаа астык эбит. «Остров мечты» диэн пааркаҕа бөлөхтөрүнэн арахсан аттракционнарга биир күн оонньообуппут.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…