Москваҕа Саха муодатын күннэрэ ыытыллыахтара

Муус устар 18-19 күннэригэр TREND ISLAND Москватааҕы универмагка СӨ Сайдыы корпорациятын уонна Beinopen Муода индустриятын сайыннарар институт тэрийиилэринэн Саха муодатын күннэрэ буолуохтара.

Тэрээһин чэрчитинэн Саха сирин дизайнердара Москва стилистэрин, муода эспиэрдэрин кытта көрсүөхтэрэ, өрөспүүбүлүкэ түөрт брендин көрдөрүү буолуоҕа, олор TREND ISLAND уонна  Poison Drop универмагтарга атыыга тахсыахтара. Ону тэҥэ креативнай экэниэмикэ сайдыытын туһунан кэпсэтиилэр барыахтара.

Бырайыакка маннык бреннэр кытталлар:

• Eikirie – ыһыах бырааһынньыгыттан уонна дьүкээгирдэр култуураларыттан саҕыллыбыт кэллиэксийэ;
• Knit&Fit – айылҕа сиимбэллэрин уонна бэлиэ сирдэри кэрэһилиир таҥастар;
• SoCold — үрүҥ көмүстэн оҥоһуллубут харысхал киэргэллэр;
• Sokolnikov – оҕо саас, тыа сирин олоҕун дьүһүйэр киэргэллэр.

Кинилэр бары 2024 сыл олунньутугар СӨ Сайдыы корпорацията үлэлэппит  «Модная программа: марки, фабрики, ритейл» акселераторын кыттааччылара буолаллар. Бырагырааманы Beinopen Муода индустриятын сайыннарар институту кытта бииргэ оҥорбуттар.

“Саха бреннэрэ Москва маҕаһыыннарыгар атыыга тахсыылара – бу өрөспүүбүлүкэ креативнай экэниэмикэтин дьоһун хардыыта. Биһиги дизайнердарга оҥороллоругар уонна атыылыылларыгар эрэ көмөлөһөр буолбатахпыт – биирлиилээн талааннар тиһиктээхтик сайдар, Бүтүн Арассыыйатааҕы күөн күрэстэһиигэ тахсар инфраструктураларын тутабыт”, — диэн бэлиэтээтэ  СӨ Сайдыы корпорациятын генеральнай дириэктэрэ Афанасий Саввин.

“Биһиги көрөрбүтүнэн, эрэгийиэннэртэн тахсар муода эстетикалаах эрэ буолбакка, эрэгийиэн дойдуну кытта кэпсэтэр тыла буолбут. Саха саҥа долгуна – таҥас туһунан устуоруйа эрэ буолбатах. Маны саха киинэтин курдук өссө биир национальнай феномен тахсан эрэр диэххэ сөп. Билигин Саха сирин муодата киинэ тахсыбыт суолунан баран иһэр – ырыынакка тахсарыгар эрэллээх стартегиялаах, көрбүт киһи барыта билэр истииллээх, бэйэтэ туспа уопсастыбалаах”, — диэн тоһоҕолоон бэлиэтээтэ ВШЭ НИУ креативнай индустрияны сайыннарар институт сүрүннүүр эспиэрэ Алексей Баженов, диэн иһитиннэрэр Ил Дархан, бырабыыталыстыба пресс-сулууспата.